ԱԺ պատգամավոր Գառնիկ Դանիելյանը ահազանգում է, որ Սրբազան հայրերն ու այլ քաղաքացիները արդեն յոթերորդ ամիսն են անազատության մեջ և իրենց իրավունքները խախտված են։
«Միքայել Սրբազանը շարունակում է իրեն բնորոշ սուր ոճով փոխանցել հանրությանը անչափ կարևոր ուղերձները։ Ոգին տեղն է, վստահ, որ մեր ժողովուրդը կգնա ճշմարիտ ճանապարհով՝ շարունակելով աջակցել ՀԱԵ-ին և Ամենայն Հայոց Հայրապետին։
Արդեն յոթերորդ ամիսն է լրանում, ինչ Սրբազան հայրերն ու մեր ընկերներն անազատության մեջ են։ Թեև, բոլորը պատվով են տանում այս փորձությունը, այդուհանդերձ, սա անպատվություն և ամոթ է բոլորիս համար։
Ինչպես Բագրատ Սրբազանն է բարձրաձայնում վերջին դատական նիստերի ժամանակ՝ առանց փորձաքննություն իրականացնելու՝ տասնութ արդար մարդկանց ամիսներ շարունակ պահում են կալանքի տակ․ «իրեղեն ապացույց» համարվող տարբեր գրությունները փորձաքննություն չեն անցել, հստակ չէ, թե արդյոք դրանք վերագրվո՞ւմ են մեղադրյալներին, թե՞ ոչ։
Արդարության ճգնաժամը մեր երկրում վատ է անդրադառնում նաև մեր հայրենակիցների առողջության վրա։ Ազգային բարերար Սամվել Կարապետյանն ԱԱԾ մեկուսարանում ձեռք է բերել երկկողմանի թոքաբորբ։
Վատթարացել է նաև քաղբանտարկյալ Նարեկ Սամսոնյանի առողջական դրությունը, որն արդեն տասներորդ օրն է, ինչ հացադուլի մեջ է։ Նարեկը շտապօգնության ծառայությամբ տեղափոխվել է «Էջմիածին» ԲԿ, որտեղ հետազոտություններ է անցել, այնուհետև կրկին տարվել է ՔԿՀ։ Սա անթույլատրելի է: Նարեկ Սամսոնյանը պետք է անհապաղ տեղափոխվի բժշկական հաստատություն և վիրահատվի:
Ապօրինաբար անազատության մեջ հայտնված մեր հայրենակիցների ազատ արձակման հարցում պետք է ձևավորվի հանրային պահանջ: Քաղբանտարկյալների խնդիրը բոլորիս խնդիրն է:
Առողջություն և օր առաջ ազատություն՝ մեր բոլոր քաղբանտարկյալներին», — գրել է Դանիելյանը։
