Քաղբանտարկյալ Դավիթ Համբարձումյանը ուղերձ է հղել և շնորհակալություն հայտնել բոլոր նրանց, ովքեր դժվարին օրերին մնացել են միասնական, կանգնել արդարության կողքին և ապացուցել, որ ճնշումներն ու սահմանափակումները չեն կարող կոտրել ազատ մտածող քաղաքացուն։
«Սիրելի հայրենակիցներ
Նախ և առաջ, ուզում եմ երախտիքի անկեղծ խոսքերս հղել ձեզ բոլորիդ։ Մեր երկիրը դժվար օրեր է ապրում, բազում մարտահրավերների դիմակայում։ Այդ իրողության պայմաններում միայն միասնականությամբ ու հաստատակամությամբ կարող ենք հաղթանակներ և դրական արդյունք ունենալ, ինչում ևս մեկ անգամ համոզվեցի երեք օր առաջ։ Չլիներ ձեր աջակցությունը, չլիներ ձեր պայքարը` չէր լինի նաև իմ այս փոքրիկ ձեռքբերումը, որի շնորհիվ կրկին կարող եմ ազատ խոսքով հանդես գալ։ Ուզում եմ շնորհակալություն հայտնել ձեր վճռականության և նվիրումի համար և ասել, որ մեր պայքարը դեռ բազում՝ մեծ ու փոքր հաղթանակներով է զարդարվելու։ Ոչ մի կալանք, ոչ մի բռնաճնշում և ոչ մի նիկոլ չի կարող շեղել մեզ մեր ընթացքից։ Այո, մենք գիտեինք, որ ուղին, որով միասին որոշել ենք ընթանալ, հեշտ չէ։ Բայց այդ զրկանքներն ավելի քան իմաստալից են։ Ավելին ասեմ՝ առանց այդ զրկանքների որևէ արդյունք չէինք կարող ունենալ։ Դրանք այն դժվարություններն են, որոնք պետք է հաղթահարվեն, որպեսզի ունենանք մեր երազանքի Հայրենիքը՝ ուժեղ և պատվարժան Հայաստանը»։
