«Հրապարակ» թերթը գրում է. «Հունվարի 12-ից Հրազդանի ներքաղաքային երթուղին թանկացավ՝ բնակիչները 100 դրամի փոխարեն ստիպված են վճարել 150 դրամ: Տրանսպորտի գինը թանկացավ, սակայն սպասարկման որակը չլավացավ: Բազմաթիվ հրազդանցիներ դժգոհություն են հայտնում թե՛ թանկացման, թե՛ սպասարկման հետ կապված: Սոցիալական հարթակներում բուռն քննարկումներ են գնում՝ տրանսպորտի գնի բարձրացման հետ կապված:
Օգտատերերից մեկը՝ Եվա Գեւորգյանը, գրել է. «Հարգելի Հրազդան համայնքի տրանսպորտի գծով պատկան մարմիններ, ինչպե՞ս է ձեր թանկագին առողջությունը, հո չե՞ք մրսել ճանապարհներին տրանսպորտին սպասելուց։ Կարեւորը՝ դուք լավ եղեք, իսկ թե ինչպես է Հրազդան համայնքի մի ողջ բնակչություն, դա այդքան էլ էական չէ երեւի։ Եվ ինչքա՞ն ենք մենք պայքարելու միջքաղաքային տրանսպորտի համար։ Ե՞րբ է վերջապես կարգավորվելու ժամային գրաֆիկը։ Թանկացումից հետո նորմալ աշխատեց ընդամենը հաշված օրեր։ Հիմա նորից նույն քաոսային իրավիճակն է տիրում ողջ համայնքում։ Սարքեցիք 150 դրամ, ասեցինքլավ, ոչինչ, կողմ ենք նորամուծություններին։ Բայց ստացանք հակառակ եւ ավելի վատ պատկեր։ Վերջապես, բնակչության ձայնը ե՞րբ է լսելի դառնալու այս անտեր երկրում։ Ինչքա՞ն պիտի կանգնենք ու սպասենք, այն էլ՝ այս սառնամանիք եղանակին։ Հասկանում ենք՝ դժվար է, այս սառույցին տրանսպորտն էլ է դժվար երթեւեկում, բայց կարելի է, չէ՞, երկկողմանի լուծում գոնե գտնել։ Խնդրանքս է եւ, ինչու ոչ պահանջս է․ այս գրառումս չգրել սառույցի վրա, այլ տալ ընթացք՝ համապատասխան վերջաբանով։ Իսկ եթե կգտնվեն մարդիկ, ովքեր բահերով ու քլունգներով կհարձակվեն այս իմ գրառման տակ, խնդրում եմ՝ դուրս եկեք ձեր սեփական մեքենաներից եւ երկու օր (ոչ ավել, որովհետեւ չեք կարող) օգտվեք հանրային տրանսպորտից»։
Մեկ այլ քաղաքացի էլ նշում է. «Մեր քաղաքի տրանսպորտի վիճակը վատ էր, բայց այժմ ահավոր է, եթե այսպես շարունակվի, կարելի է հրաժարվել դրանցից, բացի ժամերով կանգառներում սպասելուց, չգիտես ինչու, գործարան գնացող տրանսպորտը հասել ա Քաղսի, որպեսզի Հրազդանից գնաս գործարան, պիտի 600 դրամ ծախսես: Տեսնես հրազդանցի՞ է այսպիսի ուղերթ մշակողը, շատ դժգոհ ենք ձեր աշխատանքից»:
Փաստորեն, դեռ ամիսներ առաջ որոշված էր, որ քաղաքային երթուղու սակագինը պետք է թանկանա: Հրազդան համայնքի ղեկավար Սեւակ Միքայելյանը, ստուգելու համար բնակչության տրամադրվածությունը, նախապես տրանսպորտի թանկացման հետ կապված մի գրառում էր արել, որտեղ ասվում էր. «Վերջին երեք տարիների ընթացքում Հրազդանի համայնքապետարանը պարբերաբար հայտարարել է մրցույթ՝ նոր ծառայություններ ներգրավելու նպատակով։ Ցավոք, ոչ մի ընկերություն չի մասնակցել՝ պայմանավորված գործող 100 ՀՀ դրամ սակագնով: Մի շարք ընկերություններ պատրաստ են այս ոլորտում շուրջ 500 մլն ՀՀ դրամ ներդրում անել՝ նպատակ ունենալով ներգրավել ժամանակակից եւ հարմարավետ տրանսպորտային միջոցներ`ուղեւորների եւ հատկապես հաշմանդամություն ունեցող քաղաքացիների համար բոլոր անհրաժեշտ հարմարություններով, ինչպես նաեւ՝ վերանայել գործող երթուղիների ցանցը: Սակայն նման բարելավումներն իրագործելու համար ընկերություններն առաջարկում են ներկայիս 100 ՀՀ դրամ ուղեվարձը դարձնել 150 ՀՀ դրամ ՝ժամանակակից տրանսպորտի սպասարկման եւ երթուղու որակը բարձրացնելու նպատակով: Հարգելի՛ համաքաղաքացիներ, մեզ համար չափազանց կարեւոր է լսել ձեր կարծիքը։ Դուք եք որոշում կայացնելու․ համայնքապետարանն այս հարցում միանձնյա որոշում չի կայացնելու: Ինչպե՞ս եք գնահատում նման փոփոխության անհրաժեշտությունը։ Ի՞նչ առաջարկներ ունեք ներհամայնքային երթուղիների բարելավման վերաբերյալ։ Խնդրում ենք մեկնաբանություններում կիսվել ձեր մտքերով, առաջարկություններով եւ դիտարկումներով»:
Բնակիչներն էլ իրենց կարծիքն են հայտնել, մեծամասնությունը դեմ է եղել տրանսպորտի սակագնի թանկացմանը, սակայն համայնքապետն անտեսել է հրազդանցիների արձագանքը: Հրազդանի համայնքապետարանի կողմից համայնքի ներհամայնքային ընդհանուր օգտագործման ավտոմոբիլային տրանսպորտով ուղեւորների կանոնավոր փոխադրումներ իրականացնող կազմակերպությունների մրցույթը կայացել է 2025 թվականի դեկտեմբերի 2-ին։ Մրցույթին մասնակցել եւ հաղթել է «Մուլտի տրանսպորտ» ՍՊԸ-ն: Այս 1 ամսվա ընթացքում արդեն համայնքապետը գիտեր, որ տրանսպորտի սակագինը 150 դրամ է լինելու, եւ միայն տրանսպորտի` երթուղի դուրս գալուց 2 օր առաջ է բնակիչներին տեղյակ պահում, որ «Մուլտի տրանսպորտ» ընկերությունը ներգրավել է 18 նոր տրանսպորտային միջոց՝ համայնքում առավել հարմարավետ փոխադրումներ իրականացնելու նպատակով, եւ ուղեվարձի գինը 150 դրամ է:
Քանի որ երթուղին ներհամայնքային է, փորձեցինք համայնքապետարանի մամուլի քարտուղար Մայիս Պողոսյանից տեղեկանալ, թե ինչ հիմնավորում կտան թանկացման հետ կապված, եւ արդյո՞ք ի սկզբանե չեն իմացել, որ տրանսպորտի գինը թանկանալու է, քանի որ հենց համայնքապետարանն է մրցույթ հայտարարում եւ մրցույթում նշում նաեւ այն պայմանները, ըստ որոնց՝ մասնակից ընկերությունն էլ պետք է հաղթի մրցույթը: Պողոսյանն ասաց, որ չի ուզում ոչ մի հարցի պատասխանել, պատճաբանելով, որ ես կարծիք եմ հայտնել եւ դրդում եմ բնակիչներին՝ չվճարել այդ 150 դրամը: Ուզում եմ Պողոսյանին հիշեցնել, որ, որպես համայնքապետարանի աշխատակից, ինքը պարտավոր է պատասխանել մեր հարցերին, դա լինի գրավոր, թե բանավոր, քանի որ աշխատավարձ է ստանում մեր հարկերից:
Ներքաղաքային երթուղու թանկացման եւ սպասարկման որակի հարցով զրուցեցինք նաեւ «Մուլտի տրանսպորտ» ՍՊԸ տնօրեն Արթուր Դալլաքյանի հետ։ «Սուտ են խոսում, արդեն հոգնացնում են, ժամերը կանոնակարգված են այս պահից ի վեր աշխատում, արդեն 1 շաբաթ է: Երթուղի ունենք15 րոպեն մեկ է դուրս գալիս, երթուղի ունենք՝ 20 րոպե, այս սեզոնին: Իհարկե՝ փետրվարից կփոխվի»: Հարցրինք՝ 18 մեքենաներն էլ շահագործվո՞ւմ են։ «Չէ, այս պահին 14 մեքենա է սպասարկում, բնականաբար, փետրվարից կսկսի փոփոխվել, երբ ուսանողությունն էլ լինի, փոխադրման առումով 3 կամ 4 տրանսպորտային միջոց կավելանա: Ինչ վերաբերում է թանկացման հետ կապված, ես դա թանկացում չեմ համարում, դա իրականություն ա: Սենց համեմատենք 30 տարի մի սակագին է եղել, որն ընդհանրապես չի համապատասխանել տվյալ փոխադրմանը, իսկ հիմա որոշ չափով, կարելի է ասել, համապատասխանում է»,- ասաց Արթուր Դալլաքյանը»։
Մանրամասները՝ «ՀՐԱՊԱՐԱԿ» օրաթերթի այսօրվա համարում
