Յուտայի Սանդենսի կինոփառատոնում մի տղամարդ մոտեցել է ԱՄՆ դեմոկրատ ներկայացուցիչ Մաքսվել Ալեխանդրո Ֆրոստին, սպառնացել արտաքսել նրան, ապա հարվածել է դեմքին, ասել է Ֆլորիդայի օրենսդիրը։
«Սանդենսում ինձ վրա հարձակվել է մի տղամարդ, որն ինձ ասել է Թրամփի կողմից ինձ արտաքսելու մասին, ապա հարվածել է դեմքիս», — գրել է Ֆրոստը իր X սոցիալական ցանցի էջում։
Կոնգրեսականի խոսքով՝ հարձակվողը հարբած է եղել և փախչելիս ռասիստական արտահայտություններ է բղավել։ Ֆրոստը հավելել է, որ իրեն լավ է զգում, և որ տղամարդը ձերբակալվել է։
Variety-ն հաղորդում է, որ միջադեպը տեղի է ունեցել ուրբաթ օրը՝ Creative Artists Agency-ի միջոցառման զուգարանում։ Պարբերականը հայտնում է, որ Պարկ Սիթիի ոստիկանությունը կասկածյալին նույնականացրել է որպես Քրիստիան Յանգ, և որ նա անօրինական կերպով մուտք է գործել մասնավոր երեկույթ։ Ոստիկանությունը հավելել է, որ կասկածյալը նաև հարձակվել է մի կնոջ վրա։
2026 թվականի Սանդենսի կինոփառատոնը տեղի է ունենում հունվարի 22-ից մինչև փետրվարի 1-ը։
