Լեհաստանի արտաքին գործերի նախարարությունը խորհուրդ է տվել լեհ քաղաքացիներին զերծ մնալ Ռուսաստան բոլոր ուղևորություններից՝ Ուկրաինայում շարունակվող պատերազմի և այն փաստի պատճառով, որ Ռուսաստանի իշխանությունները պաշտոնապես Լեհաստանը հայտարարել են «անբարյացակամ» պետություն: Նախարարության կայքում երկուշաբթի՝ փետրվարի 16-ին, հրապարակված պաշտոնական հայտարարության մեջ նախարարությունը նաև խորհուրդ է տալիս Ռուսաստանում գտնվող լեհ քաղաքացիներին «լքել նրա տարածքը հասանելի առևտրային և մասնավոր միջոցներով, եթե անձնական, ընտանեկան կամ մասնագիտական հանգամանքները չեն պահանջում նրանց մնալ երկրում»:
Փաստաթղթում ընդգծվում է, որ Ռուսաստանում գտնվող լեհ քաղաքացիներին հյուպատոսական օգնություն ցուցաբերելու հնարավորությունները գնալով սահմանափակվում են: Սա պայմանավորված է Ռուսաստանի իշխանությունների կողմից Սանկտ Պետերբուրգում և Կալինինգրադում Լեհաստանի գլխավոր հյուպատոսությունները փակելու որոշումներով, ինչը հանգեցրել է դիվանագիտական և հյուպատոսական անձնակազմի թվի կրճատմանը: «Անվտանգության իրավիճակի կտրուկ վատթարացման, սահմանների փակման կամ այլ անկանխատեսելի հանգամանքների դեպքում տարհանումը կարող է զգալիորեն դժվարանալ կամ նույնիսկ անհնար դառնալ», — զգուշացրել է նախարարությունը:
