ՀՀ կրթության, գիտության, մշակույթի և սպորտի նախարար Ժաննա Անդրեասյանը հանդիպել է Հայաստանի Հանրապետությունում հավատարմագրված ֆրանկոֆոն երկրների դեսպանների հետ՝ քննարկելու Ֆրանկոֆոնիայի միջազգային օրվա և երկամսյակի շրջանակում նախատեսվող ծրագրերն ու միջոցառումները։
Հանդիպմանը մասնակցել են նաև ԿԳՄՍ նախարարի տեղակալներ Արթուր Մարտիրոսյանը և Դանիել Դանիելյանը։
Ողջունելով ներկաներին՝ Ժաննա Անդրեասյանը նշել է, որ նախապատրաստական աշխատանքներն իրականացվում են հագեցած բովանդակությամբ և հանրային լայն ներգրավմամբ՝ ապահովելով կրթական, մշակութային և այլ հաստատությունների աննախադեպ մասնակցություն։
«Շատ կարևոր է նաև, որ Հայաստանը հյուրընկալելու է Ֆրանկոֆոնիայի 10-րդ միջազգային մարզամշակութային խաղերը, որոնք մեր երկրում ֆրանկոֆոն միջավայրի բարելավման նպատակ ունեն: Ֆրանկոֆոն արժեքների տարածման ամրապնդումը մեր օրակարգում է»,- ասել է Ժաննա Անդրեասյանը։
Նրա իրազեկմամբ՝ կրթական և մշակութային հաստատությունները տարբեր բովանդակությամբ ծրագրեր են առաջարկում ինչպես Երևանում, այնպես էլ մարզերում: Այս տարի առաջին անգամ ֆրանկոֆոն երկամսյակին կմիանան նաև երիտասարդական կենտրոնները՝ ընդլայնելով մասնակիցների շրջանակը, դառնալով ֆրանկոֆոնիայի համընդհանուր արժեքների կրող և տարածող։
«Պատահական չէ, որ այս տարվա խորագիրն է՝ «Լեզու, մշակույթ, խաղաղություն և համերաշխություն»։ Համոզված եմ՝ նախատեսվող միջոցառումները լիովին կհամապատասխանեն այդ նշանաբանի ոգուն և բովանդակությանը»,- ասել է նա։
Հանդիպման ընթացքում ներկայացվել են միջոցառումների ընդհանուր ծրագիրը, անդրադարձ է եղել Ֆրանկոֆոնիայի 10-րդ հոբելյանական խաղերը Հայաստանում հյուրընկալելու նախապատրաստական աշխատանքների ընթացքին։ Խաղերից առաջ Հայաստանը կհյուրընկալի Ֆրանկոֆոն երկրների մշակույթի նախարարների համաժողովը։
Ֆրանկոֆոն երկրների դեսպանները ևս ներկայացրել են իրենց նախաձեռնությունները, սպասվող ծրագրերը: ՀՀ-ում Ֆրանսիայի Հանրապետության արտակարգ և լիազոր դեսպան Օլիվիե Դըկոտինյին ողջունել է Ֆրանկոֆոնիայի կազմակերպությանը միացած նոր գործընկերներին՝ Լիբանանի, Եգիպտոսի և Բուլղարիայի դեսպաններին։ Նա տեղեկացրել է՝ նախատեսվում է ֆրանկոֆոն ֆիլմերի փառատոն, որի շրջանակում կներկայացվեն ֆրանսիական և ֆրանս-շվեյցարական ֆիլմեր։ Դեսպանի փոխանցմամբ՝ այս տարի Հայաստանում երկրորդ անգամ կանցկացվի Ֆրանսիայի հեղինակավոր «Գոնկուր» գրական մրցանակաբաշխությունը, Երևանում և մարզերում կկազմակերպվեն մշակութային տարբեր միջոցառումներ։
