Դուբայի միջազգային օդանավակայանը մասամբ վերսկսել է իր գործունեությունը ինքնաթիռների ժամանման և մեկնման լիակատար դադարեցումից հետո։ Այս մասին շաբաթ օրը՝ մարտի 7-ին, հայտարարել է օդանավակայանի մամուլի ծառայությունը։
«Այսօր՝ մարտի 7-ից, մենք մասամբ վերսկսել ենք մեր գործունեությունը», — ասվում է X սոցիալական մեդիա հարթակում տարածված հայտարարության մեջ։
Հայտարարության մեջ կոչ է արվում ուղևորներին չժամանել օդանավակայան, եթե չեն ստացել իրենց ավիաընկերությունից հաստատում որևէ չվերթի վերաբերյալ։ Հայտարարության մեջ նաև ընդգծվում է, որ ներկայումս թռիչքների ժամանակացույցը շարունակում է ճշգրտվել։
Դուբայի կառավարությունն այսօր ավելի վաղ հայտարարել էր էմիրության միջազգային օդանավակայանի գործունեության լիակատար դադարեցման մասին։ Իշխանությունները բացատրեցին, որ միջոցներ են ձեռնարկվել օդային ճանապարհորդությունների անվտանգությունն ապահովելու համար։ Միևնույն ժամանակ, իրաքյան Naya լրատվամիջոցը հաղորդել է, որ իրանական ուժերը հարձակվել են Դուբայում գտնվող ամերիկյան ռազմաբազայի վրա։
