Կյանքից հեռացավ վաստակաշատ պատմաբան, արևելագետ, պատմական գիտությունների դոկտոր, պրոֆեսոր, դիվանագետ Վահան Բայբուրդյանը։
Վահան Բայբուրդյանը հայտնի է առաջին հերթին իր գիտական վաստակով։ Նրա ուսումնասիրության շրջանակներն են եղել Իրանի և իրանահայության պատմությունը, մասնավորապես Նոր Ջուղայի խաղացած տնտեսական և քաղաքական դերը, թուրք-իրանական հարաբերությունները, Հայկական հարցը, հայ-քրդական հարաբերությունները և այլն։
Վահան Բայբուրդյանը Իրանի իսլամական հանրապետությունում Հայաստանի Հանրապետության առաջին դեսպանն էր 1992 թվականից մինչև 1998 թվականը՝ արտակարգ և լիազոր դեսպանի կարգավիճակով։ Այս տարիները ճակատագրական էին Հայաստանի համար ընդհանրապես, և բազմաթիվ խնդիրների շարքում խուլ շրջափակման մեջ հայտնված մեր երկրի համար կարևորագույններից էին Իրանի Իսլամական Հանրապետության հետ հարաբերությունները։ Վահան Բայբուրդյանը կարողացավ գիտնականի իր հարուստ իմացությունների պաշարին գումարել դիվանագիտական արվեստի հմտությունները, ինչը և կարևոր նախապայմաններից մեկը հանդիսացավ զրոյական հիմքից սկսված հայ-իրանական կենսական հարաբերությունների ձևավորման, զարգացման և արդյունավորման համար։
Բարձր գնահատելով Վահան Բայբուրդյանի գիտական և դիվանագիտական վաստակը՝ Հայ Ազգային Կոնգրեսը իր վիշտն է հայտնում նրա մահվան առիթով և ցավակցում հանգուցյալի ընտանիքին, հարազատներին, գործընկերներին։
