Թուրքիայի Բուրսա նահանգի ոստիկանությունը հայտնաբերել է ութամյա տղայի, որին հայրը յոթ տարի թաքցրել էր մորից։ Նրան գտել էին լքված տանը՝ փլատակների մեջ, հաղորդում է DHA լրատվական գործակալությունը։
Ըստ գործակալության՝ տղամարդը՝ Ումութ Կ.-ն, ապրել է Գերմանիայում, որտեղ հարաբերությունների մեջ է եղել Գերմանիայի քաղաքացի Ռեբեկա Ս.-ի հետ։ 2018 թվականին զույգը որդի է ունեցել։ Մեկ տարի անց տղամարդը կնոջ և երեխայի հետ մեկնել է Թուրքիայի Բուրսա նահանգ, որտեղ, ըստ լրատվամիջոցների տեղեկությունների, կոնֆլիկտից հետո որոշել է որդուն թողնել Թուրքիայում։
«Ըստ տեղեկությունների՝ տղամարդը երեխային հանձնել է իր մորը, որից հետո տղան թաքնվել է հարազատների մոտ և 7 տարի շարունակ տանից դուրս չի եկել։ Ավելի ուշ երեխայի հայրը մահացել է սրտի կաթվածից», — պարզաբանել է հրատարակությունը։
Ոստիկանությունը որոնողական աշխատանքները սկսել է այն բանից հետո, երբ տղայի տատիկը դադարել է ներկայանալ դատական նիստերին ։
Ոստիկանության 6 աշխատակիցներից բաղկացած հատուկ խումբը հսկողություն է սահմանել նրա նկատմամբ և դուրս եկել լքված տուն, որտեղ գտնվում էր երեխան:
Իրավապահների տվյալներով ՝ տղան, ով երբեք դպրոց չի հաճախել, հայտնաբերվել է հյուծված վիճակում և հանձնվել սոցիալական պաշտպանության մարմինների խնամքին:
Երեխայի տատն ու նրա զարմիկը բերման են ենթարկվել, ապա ձերբակալվել ՝ մարդուն ազատությունից ապօրինի զրկելու մեղադրանքով: Նախաքննությունը շարունակվում է: