Մեծ Բրիտանիան մշակում է երկիրը պատերազմին նախապատրաստելու իր համապարփակ ծրագրի թարմացված տարբերակը: Այսպես կոչված «Կառավարության պատերազմի գիրքը» կներառի բոլոր ասպեկտները՝ բանակից և ոստիկանությունից մինչև հիվանդանոցներ և արդյունաբերություն։
Այս մասին հայտարարել է զինված ուժերի գլխավոր հրամանատար, ավիացիայի գլխավոր մարշալ սըր Ռիչարդ Նայթոնը Sky News-ին տված հարցազրույցում։
Նրա խոսքով՝ այս համապարփակ ծրագիրը կպահանջի, որ Մեծ Բրիտանիայի բնակչությունը այլ կերպ մտածի դիմադրողականության մասին՝ հիմնվելով Սառը պատերազմի դասերի վրա, բայց «ժամանակակից համատեքստում, ժամանակակից հասարակությունում, ժամանակակից ենթակառուցվածքներով»։
Հրապարակման մեջ նշվում է, որ նման «պատերազմական գրքերի» համակարգը ստեղծվել է Առաջին համաշխարհային պատերազմի ժամանակ և նախկինում Մեծ Բրիտանիան դարձրել է պատերազմի համար աշխարհի լավագույնս պատրաստված երկրներից մեկը: Սառը պատերազմի ավարտից հետո այն աստիճանաբար կորցրել է իր արդիականությունը և արդյունավետորեն հանվել 2000-ականների սկզբին։
Ռիչարդ Նայթոնը նշել է, որ ինքը կարծում է, որ ճիշտ է վերականգնել պատերազմի նախապատրաստման նման համապարփակ ծրագիրը, որը, ըստ ՆԱՏՕ-ի, ներառում է ոչ միայն ռազմական, այլև քաղաքացիական բաղադրիչ։
Սա ներառում է կարևորագույն ենթակառուցվածքների՝ էներգետիկայի, ջրի և տրանսպորտի, դիմադրողականության ապահովումը ոչ միայն բնական աղետների, այլև ռազմական սպառնալիքների նկատմամբ։
«Երբ մենք մտածում ենք մեր ջրամատակարարման, էլեկտրաէներգիայի կամ տրանսպորտային ենթակառուցվածքների արդիականացման մասին, մենք պետք է հաշվի առնենք պատերազմի եզրին գտնվող հակառակորդի սպառնալիքը, այլ ոչ թե միայն հիբրիդային սպառնալիքը», — ասել է նա։
