Ավստրալիայում 13-ամյա աղջկան մեղադրանք է առաջադրվել 109 դրվագով, հաղորդում է ABC News-ը։
Ըստ լրատվամիջոցի՝ մարտի 30-ին նա, ենթադրաբար, Մելբուռնի հարավ-արևելքում վարելով գողացված մեքենա, վրաերթի է ենթարկել 45-ամյա տղամարդու։ Այլ միջադեպերում նա, ենթադրաբար, հակասեմական վիրավորանքներ է հնչեցրել հետիոտների վրա։
«13-ամյա աղջիկը, որի անունը իրավական պատճառներով անհայտ է մնում, երկուշաբթի օրը ներկայացել է անչափահասների դատարան՝ գրավի դիմաց ազատ արձակվելու համար։ Նրան 109 մեղադրանք է առաջադրվել», — նշում է հրատարակությունը։
Ոստիկանությունը խուզարկել է աղջկա հեռախոսը՝ գտնելով այնպիսի որոնման հարցումներ, ինչպիսիք են՝ «վրաերթի ենթարկելու համար ի՞նչ պատիժ է սահմանվում» և «որտե՞ղ են ապրում հրեաները»։ Իրավապահները հայտարարել են, որ ամբաստանյալի բոլոր գործողությունները նպատակաուղղված են եղել, իսկ ինքը՝ աղջիկը, «սնվում» է հայտնիությամբ և հետևում, թե սոցցանցերում քանի լայք է հավաքում ենթադրյալ հանցագործությունների մասին տեղեկատվությունը:
Տեղական հեռուստաալիքի ռեպորտաժում երևում է, որ երբ նրան ուղեկցել են դատարանի դահլիճ, նա ծիծաղել է: Նշվում է նաև, որ աղջիկը ժպտացել է դատական նիստի ողջ ընթացքում:
ABC News-ի փոխանցմամբ, մեղադրյալը հայտարարել է, որ շարունակելու է հետագայում ևս խախտել օրենքը: Դատախազի հաշվարկներով՝ 74 օրվա ընթացքում նա օրական միջինը 1,45 հանցագործություն է կատարել։
Աղջկա գրավի վերաբերյալ խնդրանքը մերժվել է հասարակության համար հնարավոր սպառնալիքի պատճառով։ Նա երեք շաբաթից կրկին կկանգնի դատարանի առաջ։
