ABC 15-ը հաղորդել է, որ ԱՄՆ Արիզոնա նահանգից 18 ամսական տղան սխալմամբ մահացած է ճանաչվել բժշկի կողմից լողավազանում տեղի ունեցած դժբախտ պատահարից հետո։
Դեպքը տեղի է ունեցել փետրվարին. երեխան գրեթե խեղդվել է և շտապ տեղափոխվել բժշկական կենտրոն։ Հերթապահ բժիշկ Արիան Թուսին պաշտոնապես հայտարարել է տղայի մահվան մասին, չնայած բուժքույրը կարողացել է զգալ նրա զարկերակը։
Ավելին, արձագանքող ոստիկաններից մեկը բժշկին ասել է, որ լսում է զոհի շնչառությունը, բայց բժիշկը ամբարտավանորեն անտեսել է ոստիկանի խոսքերը։
Մյուս իրավապահ մարմինները նույնպես կենդանության նշաններ են արձանագրել նույնիսկ այն բանից հետո, երբ երեխայի մարմինն արդեն ուղարկվել էր դիահերձարան։ Սակայն Թուսին շարունակել է պնդել իր դատավճռի վրա։
Սարսափելի սխալը հայտնաբերվել է միայն մի քանի ժամ անց՝ դատաբժշկական փորձագետների շնորհիվ, որոնք պարզել են, որ տղան շնչում է։
Երեխային շտապ տեղափոխել են մանկական հիվանդանոց, որտեղ պարզվել է, որ բժշկական օգնության բացակայությունը երկար ժամերի ընթացքում ուղեղի վնասվածք է առաջացրել։
Նա կարիք կունենա ողջ կյանքի խնամքի։ Գործը ուղարկվել է դատախազություն։