Թուրքիայի Ազգային մեծ ժողովի նախագահ Նուման Քուրթուլմուշը հայտարարել է, որ Հայաստանի և Ադրբեջանի միջև խաղաղության գործընթացը հասել է կարևոր փուլի, և Թուրքիայի մասնակցությամբ հնարավոր է ձևավորվի Թուրքիա-Հայաստան-Ադրբեջան տարածաշրջանային համագործակցության նոր հարթակ։ Այս մասին նա ասել է TRT-ին տված հարցազրույցում, հայտնում է Anadolu-ն։
«Կովկասում Հայաստանի և Ադրբեջանի միջև համաձայնության հիմքն արդեն ձևավորվել է։ Հուսով եմ՝ Թուրքիայի մասնակցությամբ այստեղ կստեղծվի Թուրքիա-Հայաստան-Ադրբեջան համագործակցության նոր կենտրոն», — նշել է Քուրթուլմուշը։
Նա նաև ընդգծել է, որ Թուրքիան դարձել է համաշխարհային դիվանագիտության կարևոր կենտրոններից մեկը և կոչ արել ՆԱՏՕ-ին վերանայել իր ռազմավարությունը՝ ավելի մեծ ուշադրություն դարձնելով խաղաղության կառուցմանը։