Անտարկտիդայից եկող ցուրտ ճակատը հարվածել է Նոր Զելանդիային՝ բերելով ռեկորդային ձյուն և սառցակալում։ Օգոստոսի 4-ին մայրաքաղաք Վելինգտոնում ձյուն է տեղացել 15 տարվա ընթացքում առաջին անգամ, ըստ տեղական Stuff հրատարակության։
Ըստ օդերևութաբանների՝ Հարավային կղզու մի քանի շրջաններում ջերմաստիճանը իջել է մինչև -9 աստիճան ցելսիուս։ Հյուսիսային կղզու արևելյան ափին ուժեղ կարկուտ է տեղացել, և որոշ մայրուղիներ փակվել են եղանակի պատճառով։ Քրայսթչըրչի միջազգային օդանավակայանում ինքնաթիռը ստիպված է եղել դադարեցնել վայրէջքը քամու և անձրևի պատճառով։
Դանիդինում՝ Հարավային կղզու երկրորդ ամենամեծ քաղաքում, դպրոցականներին շուտ են տուն ուղարկել, իսկ տեղացիները փողոցներ են դուրս եկել սնոուբորդներով և դահուկներով։
Տեղական լրատվամիջոցները նաև նշել են, որ ոստիկանությունը գրանցել է սառցակալած ճանապարհներից մեքենաների դուրս գալու բազմաթիվ դեպքեր և կոչ է արել վարորդներին խուսափել ճանապարհորդությունից։ Ազգային էլեկտրական ցանցի օպերատոր Transpower-ը չորեքշաբթի առավոտյան իր կայքում հայտնել է ռեկորդային գագաթնակետային էլեկտրաէներգիայի պահանջարկի մասին և ուրբաթ օրը զգուշացրել է էլեկտրաէներգիայի հնարավոր պակասի մասին։
Օդերևութաբանները չորեքշաբթի օրը կանխատեսում են աննշան տաքացում, բայց գիշերային ջերմաստիճանը կրկին կիջնի մինչև ռեկորդային ցածր մակարդակ, և հինգշաբթի օրը երկրի որոշ մասերում կարող է լինել տարվա ամենացուրտ առավոտը։ Քենթերբերիի որոշ հատվածներում ջերմաստիճանը կնվազի մինչև -10 աստիճան ցելսիուս։
