«Հրապարակը» գրում է. «Վեդիում երեխաների շահագործման ու թրաֆիքինգի աղմկահարույց գործը մտել է դատարան: Առաջին դատական նիստը կայացել է: Երեք մեղադրյալների խափանման միջոց կալանքը դատարանը երկարաձգել է, որից հետո դատարանը՝ Ռիմա Առաքելյանի նախագահությամբ, ինքնաբացարկ է հայտնել: Այս մասին մեզ հայտնեց աղջիկների պաշտպանը` Լուսինե Մարտիրոսյանը: «Հաշվի առնելով, որ ինքը քննարկել է մեղադրյալներից մեկի՝ չակերտավոր բարերարի հարցը, որի ընթացքում նա, կարծես թե, խոստովանական հայտարարություն է արել… քանի որ դատավորը լսել է խոստովանությունը, իսկ Դատական օրենսգրքով կա նման արգելք՝ եթե դատարանը խոստովանություն է լսել, չի կարող քննել գործը»,- ինքնաբացարկի պատճառներն է բացատրում Լուսինե Մարտիրոսյանը:
Դատավորի ինքնաբացարկից հետո գործը դեռ նոր դատավորի չի մակագրվել: Լուսինե Մարտիրոսյանը նաեւ մեզ հայտնեց, որ երեխաներն արդեն գտնվում են տանը, իսկ մինչ այդ ճգնաժամային կենտրոնում էին` խնամքի հաստատությունում: «Երեխաներն իրենց հայրիկի, մայրիկի հետ են: Այդ ընտանիքում 5 երեխա է, որից 4-ն անչափահաս է: Մեկ եղբայր ունեն, որն ունի հաշմանդամություն: Երեխաները ճգնաժամային կենտրոնում էին, որտեղ նրանց հետ հոգեբաններ էին աշխատում, որպեսզի դուրս գան այդ վիճակից: Հիմա դուրս են եկել եւ տանն են»,- ասաց Մարտիրոսյանը: Օգոստոսի 3-ին այս գործով նախաքննությունն ավարտվել է:
«Վեդի քաղաքի 64-ամյա բնակիչ, տաքսու վարորդ Դ. Ա.-ն, աշխատանքի բերումով տեղեկացված լինելով համաքաղաքացու ընտանիքի սոցիալական ծանր պայմաններից բխող խոցելի վիճակի մասին, 2025-ի սկզբից մինչեւ 2026-ի ապրիլն ընկած ժամանակահատվածում … անչափահաս աղջիկներից մեկի անօգնական վիճակն օգտագործելով, համոզելով եւ սպառնալիքի միջոցով ենթարկել է սեռական շահագործման` նրա հետ պարբերաբար ունենալով սեռական հարաբերություն»,- ասված է մեղադրականում: Էլի «վատ» դրվագներ կան: «Դ. Ա.-ի հարեւանը, որը նրանից տեղեկանալով այս նույն ընտանիքի խոցելի վիճակից, դպրոցի ճանապարհին սպասել է անչափահաս աղջկան, առեւանգել է, տարել եկեղեցու հարակից տարածք եւ սեքսուալ բնույթի բռնի գործողություններ է կատարել, իսկ Երեւանի 39-ամյա բնակիչ Վ. Ե.-ն, իբր բարեգործության պատրվակով, գնումներ է կատարել անչափահասի համար, առանձնացել է նրա հետ, որի ընթացքում կատարել է անառակաբարո գործողություններ»,- ասված է հաղորդագրության մեջ:
Սա հենց այն տղամարդն է, որը նախ հերքում էր, թե մեղավոր է, սակայն կալանքի հարցի քննարկման նիստի ժամանակ խոստովանել է մեղքը:
Հիշեցնենք․ լրագրող Սյուզի Բադոյանն իր ֆեյսբուքյան էջում առաջինն էր, որ բացահայտեց այս դեպքը` որ Վեդիում երկու անչափահաս աղջիկ՝ քույրեր, տեւական ժամանակ ենթարկվել են սեռական ոտնձգությունների, եւ որ երեխաների հորեղբայրն արդեն իսկ վրեժխնդիր է եղել ու դանակահարել է կասկածյալին: Բայց իրավապահները փորձում էին կոծկել ե՛ւ պղծման, ե՛ւ դանակահարության պատմությունը։
Ներքին գործերի նախարարությունը բարձրացված աղմուկից հետո սկզբում փորձում էր հերքել կամ նվազեցնել դեպքի մասշտաբը՝ պնդելով, թե «ահազանգերին ընթացք է տրվել», իսկ ինֆորմացիայի կոծկման մասին լուրերը չեն համապատասխանում իրականությանը: Պաշտոնական մակարդակով փորձ էր արվում ներկայացնել, թե համակարգը թերացում չի ունեցել, այնինչ դեռ փետրվարի 12-ին երեխաների հայրը դիմել էր ոստիկանություն, բայց Վեդիի ոստիկանները տեղից չէին շարժվել։ Միայն հանրային մեծ ճնշումից հետո Արարատի ոստիկանության ու քննչականի ղեկավարներին հանեցին աշխատանքից, ակտիվացան քննչականը, ՄԻՊ-ը, Վեդիի համայնքապետարանի խնամակալության բաժինը՝ նախընտրական շրջանի տրամաբանության մեջ»:
Ամբողջական հոդվածը կարող եք կարդալ այս հասցեով
