Ամերիկացիների ճնշող մեծամասնությունը իրական է համարում այն սցենարը, որի դեպքում արհեստական ինտելեկտը կոչնչացնի մարդկությանը: Այդ մասին է վկայում Public First-ի կողմից Politico լրատվական պորտալի համար անցկացված հարցումը։
Այս շաբաթ տեղի ունեցավ արհեստական բանականության հետ կապված ռիսկերի վերաբերյալ հանրային քննարկում։ Anthropic արհեստական բանականության ընկերության երկու աշխատակիցներ կիսվեցին իրենց կարծիքով, որ կա 10 % հավանականություն, որ արհեստական բանականությունը կարող է ոչնչացնել մարդկությանը 10 տարվա ընթացքում։
Հարցվածների 78%-ը նշել է, որ կա արհեստական բանականության կողմից մարդկությանը ոչնչացնելու որոշակի ռիսկ։ Նրանցից 17 %-ը կարծում է, որ դա գրեթե անկասկած է, իսկ 46%-ը ռիսկը գնահատում է որպես նշանակալի կամ միջին։
Հարցվածների ևս 15%-ը կարծում է, որ ռիսկը գոյություն ունի, բայց փոքր է։ Միայն 7%-ն է հերքում նման վտանգի գոյությունը։ Մնացածը չեն կողմնորոշվել։
Միևնույն ժամանակ, հարցվածների 43%-ը կարծում է, որ ընդունելի է, որ Միացյալ Նահանգները հետ մնան այլ երկրներից արհեստական բանականության զարգացման հարցում, եթե դա անհրաժեշտ է համակարգը ավելի անվտանգ դարձնելու համար։ Հարցվածների 37%-ը պատրաստ է ռիսկի դիմել՝ այս ոլորտում ԱՄՆ-ի առաջատարությունն ապահովելու համար։
Հարցման մասնակիցների քառասունութ տոկոսը համաձայն է եղել ավելի առաջադեմ արհեստական բանականության համակարգերի մշակումը կասեցնելու առաջարկի հետ, քանի որ դրանք արդեն բավականաչափ զարգացած են։ Միայն 31%-ն է կարծում, որ մշակումը պետք է շարունակվի, քանի որ արհեստական բանականությունը կարող է օգուտներ բերել։
Հարցումը անցկացվել է առցանց սեպտեմբերի 13-ից 15-ը 2064 ամերիկացի չափահասների շրջանում։ Սխալի թույլատրելի միջակայք չի տրամադրվել։
