Հայրենիքի հզորացման ու զարգացման և մեր ժողովրդի անսասանության ու հավերժության աղբյուրն անկախությունն է: Ասված է Մեծի Տանն Կիլիկիո կաթողիկոս Արամ Ա-ի ուղերձում։
«Այսօր՝ սեպտեմբերի 21-ին, Հայաստանի անկախության օրն է։
Անկախությունն աստվածատուր պարգև է, այն պետք է պահել հավատարմությամբ։ Անկախությունը նաև մարդու իրավունքների հիմնական սկզբունքներից մեկն է, այն հարկավոր է հարգել։ Անկախության ամուր պահպանումը և դրա սկզբունքներին, արժեքներին ու հրամայականներին հավատարիմ լինելը ենթադրում են հավատ, կամք ու պայքար։
Ա՛յս գիտակցությամբ հայ ժողովուրդը կերտեց ու պահպանեց իր անկախությունը. և երբ պատմական պայմանների պարտադրանքով կորցրեց այն, վերականգնելու տեսլականը վերածեց ամենօրյա պայքարի։
Իրոք, հայրենիքի հզորացման ու զարգացման և մեր ժողովրդի անսասանության ու հավերժության աղբյուրն անկախությունն է։
Հայաստանի անկախության տոնումը պատգամ է՝ ուղղված յուրաքանչյուր հայի, հավատարիմ լինելու անկախությանը՝ որպես սրբազան արժեքի»։
