ՌԴ Անվտանգության խորհրդի փոխնախագահ Դմիտրի Մեդվեդևը չի բացառել, որ ՀՀ վարչապետ Նիկոլ Փաշինյանը, Ադրբեջանի նախագահ Իլհամ Ալիևի վերջին կոշտ հայտարարություններից հետո, կհիշի ՀԱՊԿ-ին Հայաստանի անդամակցության մասին: Նա այս մասին ասել է ՌԻԱ «Նովոստի»-ին:
«Ես չեմ զարմանա, եթե մորուքը սափրած Փաշինյանը հիշի, որ Հայաստանը ՀԱՊԿ անդամ է: Կամ էլ մեկ այլ տարբերակ. հաշվի առնելով ՀՀ առաջնորդների՝ Եվրամիության հետ «նշանադրվելու» մտադրությունը՝ կարելի է ուղիղ դիմել ԵՄ-ին: Նրանք սիրում են փողով և զենքով օգնել դրախտի թեկնածուներին»,- նշել է ՌԴ ԱԽ փոխնախագահը:
Հիշեցնենք, որ օրերս Ալիևը Հայաստանն անվանեց Հարավային Կովկասի համար «սպառնալիքի աղբյուր» և հայտարարեց, որ հայկական անկախ պետությունն իրականում «ֆաշիստական պետություն է», և քանի որ Ադրբեջանը հարևան է «ֆաշիստական պետությանը», ուրեմն «ֆաշիզմի վտանգը չի վերացել և ֆաշիզմը պետք է ոչնչացվի»:
Դրանից հետո Փաշինյանը հայտարարեց, որ Բաքուն փորձում է Երևանին ագրեսիվ հռետորաբանության հրահրել։
