ԱԺ «Հայաստան» դաշինքի խմբակցության պատգամավոր Ագնեսա Խամոյանը գրում է. «Հարգելի լրագրողներ, ի պատասխան ձեր բազմաթիվ հարցերի հայտնում եմ՝
Գեղամ Նազարյանի վերջին հայտարարությունը, թե Նիկոլ Փաշինյանին հեռացնելու օրակարգ չկա, իր անձնական ընկալումներն են, որը բնականաբար չի արտահայտում «Հայաստան» խմբակցության տեսակետը։
Մեր թիվ մեկ օրակարգը ինչպես եղել, այնպես էլ մնում է այս իշխանություններին հեռացնելը, եւ բնական է, եթե խմբակցության որեւէ պատգամավոր չի կիսում այդ գաղափարը, հարցը պետք է դառնա քննարկման առարկա։
Խմբակցությունը Գեղամ Նազարյանին մանդատը վայր դնելու «խնդրանքով» չի կարող դիմել, բայցեւ ակնհայտ է, որ քննարկվելու է խմբակցությունում պարոն Նազարյանի հետագա գործունեության հարցը:
Թե ինչ կորոշվի խմբակցության նիստից հետո, պարզ կլինի միայն նիստից հետո։ Նիստի ժամկետների մասին հավելյալ տեղեկություններն՝ ավելի ուշ», — եզրափակել է Խամոյանը։
Հիշեցնենք, որ Վիետնամում՝ ՀՀ ԱԺ նախագահ Ալեն Սիմոնյանի և ՔՊ-ական այլ պատգամավորների հետ Գեղամ Նազարյանի հայտնի նկարից հետո Tribune.am-ը կապ էր հաստատել վերջինիս հետ, լսելու նրա կարծիքը ՝մամուլում և սոցիալական մեդիաներում այդքան քննարկվող նկարի հետ կապված, Գեղամ Նազարյանն ասել էր, որ եթե այդ նկարը նման արձագանք է առաջացրել, այսուհետ ամեն օր մեկ ՔՊ-ականի հետ նկար կհրապարակի, և մեր դիտարկմանը, թե արդյոք նման աղմուկը բնական չէ, եթե բարձրացնում եք Փաշինյանին և իր թիմին հեռացնելու հարցը, իսկ հետո ժպիտով նկարվում, պատգամավորը ասել էր, որ իրենց օրակարգում Փաշինյանին հեռացնելու հարց չկա:
