Եթե մենք համաձայնում ենք, չենք բոյկոտում համընդհանուր հայտարարագրումը, յուրաքանչյուր տարվա մինչև մայիսի մեկը պետք է անձամբ ներկայացնենք եկամուտների հայտարարագիր ՊԵԿ-ին, միևնույն ժամանակ ԿԲ-ն առանց իմացության առևտրային բանկերից, որ բանկում որ հաշիվ ունենք գումարային ամբողջ տարվա շարժի համար՝ ելքեր և մուտքեր ուղարկում է տեղեկությունը ՊԵԿ-ին և հարկայինի հետ այդ թվերը համադրում են:
Այս մասին Գյումրիում «Դեմ եմ հայտարարագրմանը» շարժման իրազեկման ակցիայի ժամանակ քաղաքացիներին ասաց «Հայաստանը ես եմ» նախաձեռնության ղեկավար Նաիրի Սարգսյանը:
Նրա խոսքով՝ դա շատ հեշտ է իրար հետ համեմատելը, համադրելը: «Այսինքն, տեսնում է, որ դու տարվա ընթացքում ուղարկել ես 500 հազար դրամ եկամուտ, բայց բանկից եկել է 1 մլն դրամ, միանգամից ծանուցում է ուղարկում ձեզ էլեկտրոնային պատուհանի միջոցով և անհնար է, որ դուք դա կարողանաք վերահսկել: Կազմակերպությունների ղեկավարները, հաշվապահները, իրավաբանները նույնիսկ չեն կարող վերահսկել, որովհետև դա նշանակում է՝ ունենալ լոգին, պառոլ»,- ասաց նա:
Սարգսյանը նշեց, որ ամենօրյա ռեժիմով պետք է հետևեք ստացե՞լ եք ծանուցումը, թե՝ ոչ:
«Եթե չեք ստացել ծանուցում, 5 օր սպասում է հարկայինը, դրանից հետո մտնում է դատարան, դատարանով սանկցիան վերցնում է, գնում անմիջապես ձեր բանկային քաղվածքը ստանում է բանկից: Այսինքն, բոլորիս անընդհատ վերահսկելու են. նայի՜ հա՛, էս ինչ գործողությունը էսպես չարեցիր, քո մոտ էս ինչ հարկային տեսուչը կգա ստուգման ու քո եկամուտների 20 տոկոսը կբռնագանձենք, կտանենք»,- ասաց նա:
Ապա Սարգսյանը նշեց, որ վարչապետն ինչ ասում է, սուտ է ասում. «Ցանկացած բառ ինչ բերանից հանում է, սուտ է: Ասում է՝ քաղաքացիները հերթ են կանգնել, որ հարկ վճարեն, չեն կարողանում: Այս հարցն էլեմենտար լուծում ունի՝ հայտարարագրումը դիր կամավոր, ով ուզում է, թող վճարի, ի՞նչն է խնդիրը: Իսկ ստերի սուտն այն է, թե եկամուտների հայտարարագրման համակարգը ներդրվում է կոռուպցիայի դեմ պայքարի համար: Կոռուպցիոներ մարդն, ով տրամադրված է կաշառք վերցնելու, և՛ իրավաբանին վճարելու գումար ունի, և՛ հաշվապահին և աուդիտորին, և՛ գտնվում է համապատասխան պաշտոնում ու դիրքում, և՛ կարողանում է փող վերցնի, խորհդակցում է մարդկանց հետ և բոլոր փաստաթղթերն ապահովում է: Կոռուպցիայի դեմ պայքարելու համար սա անարդյունավետ գործիք է, այստեղ էլ են խաբում»,- ընդգծեց նա:
