Հայաստանում հայտնաբերվել է Արևմտյան Նեղոսի տենդով վարակման 58 դեպք։ Այս մասին այսօր մամուլի ասուլիսում ասաց ԱՆ Հիվանդությունների վերահսկման և կանխարգելման ազգային կենտրոնի (ՀՎԿԱԿ) գլխավոր տնօրեն Ստեփան Աթոյանը՝ շեշտելով, որ հոսպիտալացվել է 41 հիվանդ։
ՀՎԿԱԿ գլխավոր տնօրենի խոսքով՝ չորս հիվանդի վիճակը ծանր է, մյուսներինը՝ միջին ծանրության։
Վարակի հայտնաբերման կասկածի առաջին դեպքը գրանցվել է օգոստոսի 7-ին, հաստատվել՝ օգոստոսի 10-ին։ Վարակման բոլոր դեպքերն արձանագրվել են Արագածոտնի մարզում։
Աթոյանը հայտնեց, որ հիվանդությունը Հայաստանում հայտնաբերվել է առաջին անգամ, սակայն մարդկությանը հայտնի է նախորդ դարի 60-ական թվականներից։
«Հատուկ պատվաստանյութ հիվանդության համար չկա։ 80 տոկոս դեպքերում հիվանդությունն ընթանում է անախտանիշ կամ գրեթե անախտանիշ, Ծանր դեպքերը, որոնք ուղեկցվում են նյարդային համակարգի ախտահարմամբ, այդ թվում մենինգիտով և էնեֆալիտով, դիտարկվում են մինչև մեկ տոկոս դեպքերում», – նշեց Աթոյանը՝ հավելելով, որ հիվանդությունն ունի ընդգծված սեզոնայնություն, քանի որ պայմանավորված է փոխանցողով՝ մոծակով։
