Իսրայելի կառավարությունը կողմ է Հայոց ցեղասպանության ճանաչմանը․ պատմակա՞ն թե՞ քաղաքական որոշում

Իսրայելի կառավարությունը կիրակի օրը քվեարկել է Հայոց ցեղասպանությունը պաշտոնապես ճանաչելու օգտին։ Այս մասին հայտնում են The Jerusalem Post-ը և Haaretz-ը։

Համապատասխան բանաձևի նախագիծը նախորդ շաբաթ ներկայացրել էր Գիդեոն Սաարը։ Քվեարկությունից հետո նա հայտարարել է․ «Ճիշտ քայլ կատարելու համար երբեք ուշ չէ»։

Նրա խոսքով՝ Օսմանյան կայսրության վերջին տարիներին հայ ժողովրդի դեմ իրականացված ցեղասպանության ճանաչումը «բարոյական և պատմական պարտականություն» է։

Իսրայելի նախարարների կաբինետը միաձայն հավանություն է տվել առաջարկին։ Այժմ որոշումը պետք է ներկայացվի Քնեսեթի լիագումար նիստի հաստատմանը։

Փաստաթղթում ընդգծվում է, որ Իսրայելը պաշտոնապես կճանաչի Հայոց ցեղասպանությունը և կդատապարտի պատմական ճշմարտության ժխտման, նսեմացման կամ խեղաթյուրման ցանկացած փորձ։