Կանադացի վետերանները պնդում են, որ հոգեբանական խնդիրների և հաշմանդամության համար օգնություն խնդրելիս Վետերանների հարցերով զբաղվող ծառայության աշխատակիցները նրանց առաջարկել են դիտարկել էվթանազիան: Այս մասին Daily Mail-ին պատմել են մի քանի նախկին զինծառայողներ։
Նրանցից մեկը Դեյվիդ Բալզերն է, որը երկու անգամ ծառայել է Աֆղանստանում և բուժվել է հետտրավմատիկ սթրեսային խանգարման և ինքնասպանության մտքերի համար: 2019 թվականին, նպաստների կրճատման մասին տեղեկացվելուց հետո, նա կապ է հաստատել գործակալության հետ՝ պարզաբանումներ ստանալու համար: Տղամարդու խոսքով՝ աշխատակիցն ուսումնասիրել է իր բժշկական գործը և առաջարկել դիտարկել էվթանազիան, թեև Բալցերը ֆիզիկապես առողջ է եղել:
Վետերանը նշել է, որ սա ընդունել է որպես իր սեփական անարժեքության հաստատում: Նա ասել է, որ այս միջադեպը դարձել է շրջադարձային պահ. հետագայում իր վիճակը վատթարացել է, և նա սկսել է չարաշահել ալկոհոլը և այլ նյութեր:
Այլ նախկին զինծառայողներ նույնպես հայտնել են, որ իրենց լքված են զգացել պետության կողմից: Փաստաբան Քեթրին Քրիստենսենը, որը ներկայացնում է էվթանազիա առաջարկված մի քանի վետերանների, հայտարարել է, որ անհրաժեշտ խնամքի փոխարեն ֆիզիկապես առողջ երիտասարդ տղամարդկանց առաջարկվում է մահ: Նա նաև պատրաստում է խմբային հայց Կանադայի կառավարության դեմ:
