Ռուսաստանի հայերի միության նախագահ Արա Աբրահամյանը կօգնի 2026 թվականի խորհրդարանական ընտրություններում միավորել Հայաստանի այն քաղաքական ուժերը, որոնք դեմ են վարչապետ Նիկոլ Փաշինյանին։ Նա այս մասին ասել է ՏԱՍՍ-ին:
«Չնայած ես մտադիր չեմ մասնակցել առաջիկա ընտրություններին, այնուամենայնիվ, կօգտագործեմ իմ բոլոր հնարավորությունները՝ օգնելու համար միավորել առողջ ուժերը, որոնք ունակ են հետևողականորեն և հայրենիքի հանդեպ սիրով օգտագործել իրենց ունեցած տնտեսական և մարդկային ներուժը, այդ թվում՝ սփյուռքը՝ հանուն Հայաստանը վերածննդի», — ասել է նա։
Աբրահամյանը նշել է, որ Փաշինյանի կառավարությունը կորցրել է Լեռնային Ղարաբաղը, երկրի ամենակարևոր օբյեկտների նկատմամբ վերահսկողությունը փոխանցում է օտարերկրացիներին, մեծացնում է Հայաստանի պետական պարտքը։
«Վերջին յոթ տարիների պատմությունը տխուր վկայություն է այն մասին, թե ինչպես Փաշինյանը, զգացմունքները մանիպուլյացիայի ենթարկելով, իրեն հավատացող մարդկանց նրանց կամքից անկախ դարձրեց այն խաբեության և ազգային ողբերգության մեղսակիցներ, որի ականատեսն ենք մենք այսօր», — հավելել է նա։
Աբրամյանը նաև նշել է, որ հայերի մեծամասնությունը սիրում է իր հայրենիքը և պատրաստ է միավորվել հանուն դրա պահպանման և բարգավաճման։
«Իսկ մոլորյալների հետ պետք է շփվենք և բացատրենք մի պարզ բան. կարող ես կորցնել քո բիզնեսը, բայց սկսել զրոյից և հարստանալ, կարող ես կորցնել ընկերներին և նորից գտնել, բայց նա, ով կորցնում է հայրենիքը, կորցնում է ամեն ինչ», — հավելել է Ռուսաստանի հայերի միության նախագահը։