Նիկոլ Փաշինյանն ամեն կերպ փորձում է պահել իր իշխանությունը և իր իշխանությանը որևէ սպառնալիքի դեպքում ինքը պատրաստ է գնալ ցանկացած քայլի, նույնիսկ Հայաստանի պետականության կորստին, միայն թե ինքը լինի իշխանություն. News.am-ին տված հարցազրույցում ասել է ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը։
«Այս իշխանությանը քաղաքական պայքարով է հնարավոր հեռացնել։ Ես այդ պայքարից որևէ վայրկյան չեմ հրաժարվել։ Ցավոք, փողոցային պայքարով մենք հաջողության չհասանք։ Մենք իրավունք չունենք մեր ժողովրդին ևս մեկ անգամ հիասթափեցնելու։ Փողոցով իշխանափոխության հասնելու հնարավորություն, այս պահին, ես չեմ տեսնում»,- ասել է Վանեցյանը։
Արձագանքելով պայքարի հարցում ընդդիմադիր ուժերի միջև տարաձայնություններին՝ Վանեցյանը նշել է, թե չի հավատում, որ իրական ընդդիմադիր ուժերն իրար հետ ունենան որևէ անհաղթահարելի տարաձայնություն՝ Նիկոլ Փաշինյանից ազատվելու հարցում.
«Նրանք կարող են ունենալ տարբեր տակտիկական մոտեցումներ։ «Հայրենիք» կուսակցությունը բարեկամական հարաբերություններ ունի բոլոր ընդդիմադիր ուժերի հետ»։
«Հայրենիք» կուսակցության նախագահն, այդուամենայնիվ, չբացառելով փողոցային պայքարը, ասել է, թե պետք է պատրաստվել ընտրություններին։
«Եթե մենք ընտրություններին չպատրաստվենք, դատապարտված ենք լինելու պարտության։ Մենք զուգահեռ երկու գործընթաց պետք է իրականացնենք՝ նախ փորձենք գեներացնել փողոցային պայքար։ Եվ չբացառելով փողոցային պայքարը՝ պետք է պատրաստվենք ընտրություններին»։
2026 թվականի ընտրություններում իր ղեկավարած կուսակցության հնարավորություններն Արթուր Վանեցյանը գնահատում է շատ լավ։
««Հայրենիք» կուսակցությունը շատ լուրջ աշխատանք է իրականացնում արդեն բավական երկար ժամանակ։ Հայաստանի գրեթե բոլոր խոշորացված համայնքներում հիմնել ենք կուսակցության գրասենյակներ, գրվում է ծրագիր։ Հստակ է, որ Նիկոլ Փաշինյանն այլևս չունի ժողովրդի մեծ աջակցությունը, Փաշինյանի վարկանիշն այսօր գտնվում է պատմական ամենացածր նիշում։ Փաշինյանի իշխանության հենասյունը իրավապահ համակարգն է»։