Իսպանիայի իշխանությունները չեն դիտարկում սաբոտաժի վարկածը Անդալուսիայի ինքնավար համայնքում տեղի ունեցած երկաթուղային աղետի հետաքննության շրջանակում, որի հետևանքով զոհվել է ավելի քան 40 մարդ։ Այս մասին երեքշաբթի հայտարարել է երկրի ներքին գործերի նախարար Ֆերնանդո Գրանդե-Մարլասկան։
«Սաբոտաժի հնարավորությունը երբեք չի դիտարկվել։ Ոչ մի պահի և ոչ մի պարագայում խոսք չի եղել սաբոտաժի մասին։ Քննարկումները մշտապես վերաբերվել են բացառապես տեխնիկական պատճառներին և երկաթուղային փոխադրումների հետ կապված խնդիրներին», — նշել է նախարարը մամուլի ասուլիսի ընթացքում։
Գրանդե-Մարլասկան քաղաքացիներին կոչ է արել չտրվել չհաստատված ենթադրություններին և սպասել ողբերգության պատճառները հետաքննող հատուկ հանձնաժողովի եզրակացությանը։ Միաժամանակ նա ընդգծել է, որ բոլոր վարկածները մնում են աշխատանքային։
Գնացքի վթարը տեղի է ունեցել հունվարի 18-ի երեկոյան՝ Իսպանիայի հարավում գտնվող Ադամուս քաղաքի մոտ։ Մադրիդ մեկնող գնացքը դուրս է եկել գծերից և սահել հարակից գծի վրա, որտեղ այդ պահին շարժվում էր հանդիպակաց գնացքը։ Բախման հետևանքով երկու գնացքներն էլ դուրս են եկել գծերից։
Վթարի հետևանքով վիրավորվել է մոտ հարյուր մարդ։ Դեպքի վայրում գնացքների երթևեկությունը ժամանակավորապես դադարեցվել է։ Վթարի պատճառները պարզելու համար ստեղծվել է հատուկ հետաքննիչ հանձնաժողով։