Այս ապօրինի իշխանությունների դեմ պայքարի գործում Դաշնակցությունը միշտ առաջին գծում է, և թե՛ փողոցային պայքարով, թե ընտրությունների միջոցով միշտ էլ պայքարելու է, որ այս իշխանություններին օր առաջ վռնդի: Այս մասին ՀՅԴ 35-րդ ընդհանուր ժողովին լրագրողների հետ զրույցում ասաց ՀՅԴ-ական, «Հայաստան» խմբակցության պատգամավոր Գառնիկ Դանիելյանը՝ պատասխանելով հարցին՝ սպասելո՞ւ են ընտրություններին, թե այլ պայքարի միջոց են ընտրելու իշխանությունների դեմ:
«Դաշնակցությունն այն կուսակցությունն է, որ չի սպասում ընտրությունների: Այս ընթացքում մի քանի շարժումների նախաձեռնողն ու առաջամարտիկն է եղել և այդ առումով ոչ թե մենք սպասում ենք հերթական ընտրություններին, այլ ամենօրյա աշխատաքն ենք տանում այս իշխանություններին հեռացնելու համար: Դա ավելի քան ակնհայտ է: Մեր ընկերներից շատերն անազատության մեջ են եղել, որոշները մի քանի օր առաջ են ապօրինի ազատազրկումից դուրս եկել, որոշ դաշնակցականների գործերն հենց հիմա դատարաններում քննվում է, բայց այն, որ ցանկացած կուսակցություն ընտրություններից հետո պետք է պատրաստվի ընտրությունների, դա չգրված օրենք է»,- ասաց պատգամավորը:
Դանիելյանը միևնույն ժամանակ ասաց, որ այս իշխանությունների դեպքում պետք է ամեն ինչ անեն, որ ընտրությունների չհասնի գործը, որովհետև այս իշխանությունները պատրաստ են ընտրությունները կեղծելու:
Անդրադառնալով Գյումրու ընտրություններին՝ նա ասաց, որ անմասն ոչ մի ընտրություններրի չեն մնում: «90 տոկոս մենք ընտրություններին մասնակցում ենք, Գյումրու ընտրություններին առանձին կգնանք, թե ինչ-որ մեկին կսատարենք, դա կորոշի կուսակցությունը, բայց դիտորդի կարգավիճակում չենք լինելու»,- ասաց նա:
Հարցին՝ հնարավո՞ր է քննարկվի «Հայաստան» դաշինքից ապահարզանի հարցը, նա ասաց. «Այդ օրակարգը չգիտեմ՝ ով է գցել կամ ինչ նպատակներ ունի այդ ամեն ինչը, մենք շատ լավ հարաբերություններ ունենք «Հայաստան» դաշինքի շրջանակներում, սա կեղծ օրակարգ է, որի պատճառը չգիտեմ: Ինչ-որ մեկն անընդհատ ուզում է, թե Հայաստան Դաշինքի ներսում հարաբերությունները լարի, լավ բան չի արվում, դրա հեղինակը շատ սխալ տեղ է գնում»: