Ռումինիայի նախագահ Նիկուսոր Դանը հաստատել է «կանանց սպանության» դեմ պայքարի օրենք, որն առաջին անգամ այս հասկացությունը ներմուծում է ռումինական օրենսդրություն և նախատեսում է մինչև ցմահ ազատազրկման պատիժ։ Համապատասխան գրառումը հայտնվել է Ռումինիայի նախագահի պաշտոնական Facebook-ի էջում։
«Կանանց նկատմամբ բռնությունը չափազանց երկար ժամանակ կամ անտեսվել է, կամ լիարժեք չի լուծվել։ Այս օրենքը ռումինական պետության պարտավորությունը կանանց և երեխաների անվտանգությունն ապահովելու համար վերածում է կոնկրետ մեխանիզմի։ Նոր օրենքի համաձայն՝ կնասպանությունը՝ կնոջ սպանությունը, որը կատարվել է սեռական ատելության հողի վրա կամ որպես ընտանեկան բռնության մաս, այժմ պատժվում է 15-ից 25 տարվա ազատազրկմամբ կամ ցմահ ազատազրկմամբ», — նշել է Ռումինիայի նախագահը գրառման մեջ։
Ռումինական օրենսդրությամբ նախկինում դաժան սպանություն դասակարգվող եզրույթն այժմ իրավաբանորեն սահմանվել է որպես սեռով պայմանավորված բռնության մի ձև։
Նախաձեռնության հեղինակները որպես միջոցառումների խստացման պատճառ նշել են ընտանեկան հանցագործությունների աճը։ 2025 թվականի առաջին ութ ամիսների վիճակագրության համաձայն՝ ընտանիքի անդամների կողմից կատարվել է 33 սպանություն, որոնց 69%-ում զոհ են եղել կանայք։ Ռումինիայում ամեն ամիս միջինում երեք կին է սպանվում իրենց հարազատների կողմից։
Օրինագիծը խորհրդարան է ներկայացվել 2025 թվականի հոկտեմբերին և աննախադեպ աջակցություն է ստացել. այն ստորագրվել է բոլոր քաղաքական կուսակցություններից խորհրդարանի ավելի քան 270 պատգամավորների կողմից։ Օրենքի կողմնակիցները ընդգծում են, որ այն իրավապահ մարմիններին գործիքներ է տալիս միջամտելու համար, նախքան ընտանեկան բռնությունը կհանգեցնի ողբերգության։
Ռումինիան դարձել է այն եվրոպական երկրներից մեկը, որը իրավաբանորեն կոդիֆիկացրել է «կնասպանություն» տերմինը։
