USAID-ի ապամոնտաժման վերջին ակորդը։ Այս մասին ֆեյսբուքյան իր էջում գրել է միջազգայնագետ Սուրեն Սարգսյանը:
«ԱՄՆ պետքարտուղար, Ազգային անվտանգության խորհրդի քարտուղար և USAID-ի փաստացի ղեկավար Մարկո Ռուբիոն վերջերս հրապարակել է մի հետաքրքիր հոդված, որը ներկայացնում է այն նոր կոնցեպտը, որի հիման վրա ԱՄՆ-ն շարունակելու է իր արտաքին օգնության քաղաքականությունը։
Ռուբիոն նշում է, որ այսուհետ արտաքին օգնությունը չի լինելու բարեգործական տեսակի օգնության տրամադրում։ Նա մեղադրում է USAID-ին, որ վերջինս հաճախ իրականացրել է ծրագրեր՝ ռեժիմների փոփոխության նպատակով՝ հեռու մնալով իր առաջնային առաքելությունից՝ առաջ մղել ԱՄՆ շահերը։
Ըստ նրա, USAID-ն տասնամյակների ընթացքում միլիարդավոր դոլարներ ծախսելով ձախողել է իր առաքելությունը։ Ըստ պետքարտուղարի, այն իրականում ստեղծել է հսկայական ՀԿ համակարգ, որը քիչ ազդեցություն է թողել զարգացող երկրների վրա։ Ծրագրերը հաճախ սրել են անկայունությունը, ուժեղացրել են հակաամերիկյան տրամադրությունները։ Ռուբիոն ընդգծում է, որ USAID-ն իր օգնությունը օգտագործել է որպես բարեգործություն, ոչ թե որպես ԱՄՆ արտաքին քաղաքականության գործիք։ Նրա ներկայացմամբ՝ ապագայում արտաքին օգնությունը կիրականացվի ԱՄՆ Պետդեպարտամենտի կողմից՝ «America First» քաղաքականությանը համապատասխան։
Օգնության տրամադրման նոր մոդելը նաև նպատակ ունի հակազդել Չինաստանի օգնության մոդելին:
Եվ վերջում նշեմ, որ USAID-ի շենքը կփոխանցվի FBI-ին՝ որպես նոր գլխամասային գրասենյակ»,-գրել է Սարգսյանը։
