ԱՄՆ նախագահի վարչակազմի պաշտոնյաները մտահոգված են, որ Իրանի հետ հակամարտությունը կվերածվի սառեցված դիմակայության, հաղորդում է Axios-ը՝ հղում անելով ԱՄՆ պաշտոնյաներին։
«Սառեցված հակամարտությունը (ԱՄՆ նախագահ Դոնալդ Թրամփի համար — խմբ.) քաղաքական և տնտեսական տեսանկյունից ամենավատ տարբերակն է», — ասել է աղբյուրը լրատվամիջոցին։
Նշվում է, որ երկու կողմերը կարող են հայտնվել այնպիսի իրավիճակում, երբ ռազմական գործողությունները չեն վերսկսվի, բայց նաև խաղաղության համաձայնագիր չի կնքվի։ Սա կարող է հանգեցնել նրան, որ Հորմուզի նեղուցը մնա փակ, իսկ ԱՄՆ ռազմածովային շրջափակումը չվերացվի։ Երկու կողմերն էլ կսպասեն, որ մյուսը թուլություն ցուցաբերի։
Լրատվամիջոցի աղբյուրների համաձայն՝ Թրամփը տատանվում է ռմբակոծությունները վերսկսելու և պատժամիջոցները խստացնելու միջև։ Axios-ի աղբյուրը ամերիկացի առաջնորդին նկարագրում է որպես «հիասթափված ռեալիստ», որը չի ցանկանում ուժ կիրառել, բայց չի կարողանում նահանջել։
Անցյալ շաբաթ նախագահ Դոնալդ Թրամփը միակողմանիորեն երկարաձգեց Թեհրանի հետ հրադադարը մինչև բանակցությունների ավարտը։ Շաբաթ օրը նա հայտարարեց, որ չեղարկել է պատվիրակության այցը Իսլամաբադ՝ նոր հանդիպման համար։ Ավելի ուշ նույն օրը նախագահը հայտարարեց, որ Միացյալ Նահանգները Իրանից ստացել է նոր առաջարկ՝ ավելի բարենպաստ պայմաններով։ Սակայն Թեհրանը սկզբում հերքեց ամերիկացիների հետ հանդիպելու ծրագրերը։
Իր հերթին, Իրանի նախագահ Մասուդ Փեզեշքիանը Պակիստանի վարչապետ Շեհբազ Շարիֆի հետ զրույցում հայտարարեց, որ երկիրը չի մասնակցի բանակցություններին ճնշման, սպառնալիքների կամ նավագնացության շրջափակման պայմաններում։