«Ժողովուրդ» օրաթերթը գրում է. ««Ժողովուրդ» օրաթերթը տեղեկացավ, որ «Դոմուսի» հրդեհից 7 ամիս անց քրեական գործով չկա մեղադրյալ, չկա կասկածյալ։ Այդպես էլ առեղծված է մնում, թե ում անգործության, կամ միգուցե շահագրգռվածության հետեւանքով «Դոմուսի» պահեստը մոխիր դարձավ։ 800 միլիոն գույքի այրումը ո՞ւմ էր ձեռնտու, ու ի՞նչ եղավ իրականում. հարցեր, որոնք 7 ամիս անց չունեն պատասխան։
Հիշեցնենք, որ հոկտեմբերի 7-ին՝ ուշ երեկոյան, ՀՀ քննչական կոմիտեն ոստիկանությունից ստացել է «Դոմուս» ՓԲԸ-ի հաղորդումը՝ Իսակովի պողոտայի 29/1 հասցեում գտնվող ընկերության պահեստային մասից հրդեհի բռնկման եւ խանութի այրվելու մասին, ինչով, ըստ հաղորդման, նախնական տվյալներով՝ ընկերությանը շուրջ 800 մլն դրամի գույքային վնաս է պատճառվել։
Հաղորդման հիման վրա՝ ՀՀ քննչական կոմիտեի ԵՔՔՎ Մալաթիա-Սեբաստիա վարչական շրջանի քննչական բաժնում նախաձեռնվել է քրեական վարույթ՝ ՀՀ քրեական օրենսգրքի 264-րդ հոդվածի 2-րդ մասի 2-րդ կետի հատկանիշներով։
Կատարվում է նախաքննություն՝ հրդեհի առաջացման պատճառները, պատճառված գույքային վնասի իրական չափերը, ինչպես նաեւ հակահրդեհային անվտանգության պահանջների պահպանվածության հանգամանքները պարզելու ուղղությամբ։
«Ժողովուրդ» օրաթերթը դեպքից 7ամիս անց դիմեց ՀՀ քննչական կոմիտե հասկանալու կամար՝ կա՞ գործով մեղավոր անձ, կամ ի՞նչ է պարզել կոմիտեն: Ի պատասխան հայտնեցին՝ նախաքննությունը շարունակվում է։
Ասել է թե՝ ո՛չ կաակածյալ կա, ո՛չ մեղադրյալ, ու ի վերջո դեռ չկա հստակ պատասխան՝ ինչի՞ց է սկսվել հրդեհը, մարդկային գործոն կա՞, թե՞ տեխնիկական խնդիրն է պատճառը»։