Արտաքին ուժերի աջակցությունն այս պահին հարցադրումներ է առաջացնում։ Այսօր հրավիրված ասուլիսում հայտարարեց «Տավուշը հանուն հայրենիքի» շարժման առաջնորդ Բագրատ Սրբազանը` խոսելով շարժման ընթացքի և գալիք զարգացումների մասին։
«Կարևոր չէ` իրենք կողմ են շարժմանը, թե՝ դեմ, տեղի ունեցածի արձանագրում պիտի կատարեն։ Հատկապես ԱՄՆ դեսպանատանն եմ ասում, որովհետև իրենց միջոցներով են տեղի ունենում ոստիկանական բարեփոխումները։ Մի՞թե իրենք այսպիսի բարեփոխումներ էին ակնկալում։ Վստահ եմ՝ ոչ։ Եվ հունիսի 12–ին տեղի ունեցած վայրագություններին, արյունահեղությանը իրենք ստիպված են արձագանքել։ Իսկ եթե իրենք կարծում են, որ ժողովրդավարությունն այսպիսի տեսք ունի, ապա ևս մեկ անգամ մաղթում եմ, որ նույն ժողովրդավարությունն էլ իրենց մոտ լինի»,– ասաց Սրբազանը։
Նա մեղադրեց արտաքին ուժերին, որ որևէ մեկն արդարության վերաբերյալ որևէ գնահատական չտվեց։ Նրա համոզմամվբ՝ արտաքին ուժերի աջակցությունն իշխանություններին, այս պահին որոշներն ակտիվորեն են իրականացնում, որոշները՝ պասիվ: Սրբազանն հավելեց նաև, որ շատ միջազգային իրավապաշտպան կազմակերպություններ, որոնք չեզոք են, նաև հայկական իրավապաշտպան միություններ արձագանքել են, ընդ որում՝ շատ խիստ․
Դիտարկմանը՝ արտաքին ուժերի աջակցությունը միայն արևմտյա՞ն կողմից չէ և շատ արտաքին այլ ուժերի այս իշխանությունները ձեռնտու է՝ Սրբազանը պատասխանեց, որ ինչ-որ իմաստով ուրախ է, որ բոլոր վերագրումներն այս շարժմանը հօդս են ցնդել։ «Թեպետ ամեն ջանք թափում են նույնականացնելու ռուսական և այլ ուժերի հետ, որոնք ցնդել են, բայց իրենք ուղղակի շարունակում են, որովեհտև կարծում են՝ ինչպես իրենք են այդպես էլ կարող է լինել յուրաքաչյուր մարդ կամ շարժում»,-ասաց նա։
Բագրատ Սրբազանը նշեց, որ իրենց դիվանագիտական խումբը տարբեր հանդիպումներ է ունեցել և ունենում։ Արձանագրել են, որ իշխանության ղեկին նստածներն այն աստիճանի ապատեղեկատվութամբ են լցրել հատկապես արևմտյան աշխարհը, որ աննկարագրելի է։
Սրբազանն ասաց, որ որևէ կերպ նեղացած չի, շատ լավ հասկանում է, թե աշխարհն ինչ մոտիվներ ունի։ «Մենք մեր խնդիրները մեր տան մեջ պետք է լուծենք, սա հայկական բովանդակությամբ մաքուր զուլալ շարժում է»,-ասաց նա։
Հիշեցնենք, որ հունիսի 12-ին «Տավուշը հանուն հայրենիքի» շարժման մասնակիցների և ոստիկանության միջև տեղի են ունեցել բախումներ։ Իրավապահները լուսաձայնային նռնակներ են կիրառել, ինչի հետևանքով 101 անձ է վիրավորվել, որից 18-ը հենց ոստիկան։
