«Ժողովուրդ» օրաթերթը գրում է. «Չնայած, որ Հայաստանի՝ ԵՄ անդամակցության թեման վերջին օրերին արտախորհրդարանական ուժերի ձեռամբ կրկին քաղաքական օրակարգ է մտել և քննարկումների թեժ փուլում է, բայց իշխանության ներսում դեռևս այս հարցի շուրջ կոնսենսուս չի ձևավորվել:
Ինչպես հայտնի է, հայաստանյան արևմտամետ դիրքերից հանդես եկող քաղաքական ուժերը՝ Տիգրան Խզմալյանի «Հայաստանի Եվրոպական կուսակցություն»-ը, Արամ Սարգսյանի «Հանրապետություն» կուսակցությունը, Արման Բաբաջանյանի «Հանուն Հանրապետության» կուսակցությունը և Լևոն Շիրինյանի «Քրիստոնեա-ժողովրդավարական» կուսակցությունը ձևավորել են «Ժողովրդավարական ուժերի հարթակ» և պաշտոնապես առաջարկել են իշխանություններին հանրաքվե անցկացնել՝ Եվրամիությանն անդամակցելու վերաբերյալ։ Ընդ որում՝ արտախորհրդարանական ուժերը ժամկետ են դրել՝ գործընթացը սկսել 3-4 ամսվա ընթացքում:
Հարցն այնքան լուրջ է դրված արտախորհրդարանական ուժերի կողմից, որ այսօր անգամ ԱԺ-ում Հայաստանի` ԵՄ անդամակցության հայտ ներկայացնելու հարցով հանրաքվե անցկացնելու առաջարկի շուրջ լսումներ են անցկացվելու:
Չնայած արտախորհրդարանական այս ուժերի խիստ շտապողականությանը՝ «Ժողովուրդ» օրաթերթը տեղեկացավ, որ ՔՊ-ի ներսում ԵՄ անդամակցության հարցով տարաձայնություններ կան: Պատգամավորներից շատերը հենց քննարկումների ժամանակ կարծիք են հայտնել, որ դեռ «պատրաստ չենք» այս կարևոր ու կտրուկ արտաքին քաղաքական շրջադարձին:
Այսպես ասած՝ ՔՊ-ում երկու թևի են բաժանված՝ մի մասը կարծում է, որ Հայաստանի միակ ճիշտ ուղին ԵՄ-ն է, մյուս մասն էլ կարծում է, որ ԵՄ անդամակցության հարցում չպետք է շտապել. պետք է յոթ չափել ու մեկ կտրել:
Թե ինչ զարգացումներ կլինեն այս մասով, ի վերջո ՔՊ-ի որ թևը կհաղթի՝ պարզ կդառնա առաջիկայում:»:
Մանրամասները՝ «Ժողովուրդ» օրաթերթի այսօրվա համարում:
