Բագրատ Սրբազանը շատ ջերմ մտերմություն ունի ՀՀ առաջին նախագահ Լևոն Տեր-Պետրոսյանի ընտանիքի, ինչպես նաև՝ ՀԱԿ-ի տարբեր անձանց հետ։
«Մտերմություն ունեմ նաև 2-րդ նախագահի շրջանակների հետ, 3-րդ նախագահի բոլոր շերտերի հետ, բացարաձակ խնդիր չկա»,- լրագրողների հետ հանդիպմանն ասաց նա։
Սրբազանի խոսքով՝ Հայաստանում չկա մեկը, որ նախկին չէ։
«Մենք բոլորս էլ ընկերներ, բարեկամներ ու հարազատներ ունենք, կարող է ընդունենք կամ չընդունենք, ես բոլոր ժամանակներում ընդդիմադիր եմ եղել՝ սկսած առաջին նախագահից, բայց թշնամիներ չենք եղել, ոչ ոք չի դարձրել որևէ մեկին հայրենիքի դավաճան»,- ասաց նա։
Սրբազանն ընդգծեց՝ բոլոր ժամանակներում սխալները, թերացումներն ու ձախողումները մարդիկ ընդունել են, բայց դրանք ողբերգություն չեն եղել, ինչպես այսօր է։
Անդրադառնալով հարցին՝ իշխանությունները «քչփորում են» վաղեմության փաստաթղթեր և մեղադրում են Սրբազանին բարեգործության անվան տակ որոշ ֆինանսական չարաշահումներում թույլ տալու մեջ Սրբազանն հավելեց. «Հստակ ասում եմ՝ ես ոչ կտտանքներից եմ վախենում, ոչ կալանքից, ոչ էլ նույնիսկ մահվանից: Այո ինձ տեղեկությունները հասել են, որ տարբեր ուսումնասիրություններ են անում, նույնիսկ 15 տարվա հաշիվների, երևի զարմացել են»,-ասաց նա։
Սրբազանը մանրամասներ հայտնեց նաև կոնկրետ Գետահովիտում կառուցված քաղցկեղով հիվանդ երեխաների հոգևոր վերականգնման կենտրոնի մասին՝ նշելով, որ իրենք մեծ ավերված տարածք ունեին և նախաձեռնել են 2020-ին այդ կենտրոնը սարքել։
Սրբազանը նշեց, որ 660 000 եվրո է փոխանցվել տարբեր փուլերով, և 4000 քառ մետր տարածքում շինարարություն է ընթացել։
«Թող հաշվեն, ոչ միայն չենք մսխել, այլև ստիպված ենք եղել մի քանի 100 000 ավելացնել այդ գումարի վրա, որ շինարարությունն ավարտենք, սարսափելի վնասներ ենք կրել, որովհետև այդ ժամանակ տարադրամի փոփոխություն է տեղի ունեցել»,-ասաց նա։
Սրբազանը հիշեցրեց նաև, որ ինքը «Ժպիտների քաղաք» բարեգործական հիմնադրամի նախագահն է՝ շեշտելով, որ կենտրոնն անվճար է։
«Իրենք թող շատ չզվարճանան, իրենք ոչ թե պետք է ուսումնասիրեն՝ մսխելու հիմք ստեղծելու համար, այլ շնորհակալագիր պատրաստեն, որ ոչ մի բանի չեն մասնակցել, պետության գործառույթն ենք մենք ստանձնել։ Լավ կլինի ուսումնասիրեն ու ամաչեն, եթե շնորհակալության թուղթ էլ պատրաստեն, ձեզ ցույց կտամ»,-ասաց նա։
Սրբազանը նաև նշեց, որ գումարներն անձնապես չի ստանում, այլ օրինական ձևով փոխանցվում են։
