Բագրատ Սրբազանն արդեն Կիրանցում է:
Բնակիչները նրան սպասում էին եկեղեցու բակում: Այս պահին նա զրուցում է բնակիչների հետ:
Նշենք, որ սրբազանը հունիսի 20-ին հայտարարեց, որ մեկնելու է Տավուշ` տեսնելու սահմանազատման արդյունքում տեղադրված ցանկապատերը, որոնց մասին ավելի վաղ հայտնել էր ՀՀ վարչապետ Նիկոլ Փաշինյանը։
«Պետական ամբողջ սահմանը քանդված է, շատերի սեփականության իրավունքն էլ` խախտված։ Բացի այդ՝ այստեղ կան մարդիկ, որոնց սեփականության վկայականները տրվել են 2018 թվականից հետո։ Այս դեպքում չեն կարող ասել, որ նախկիններն են տրվել, մարդիկ էլ կան, որոնց տները 1960-ականներից պապերից և հայրերից են փոխանցվել, բայց հիմա քանդում են»,– նշեց սրբազանը։
Կիրանցեցի 92-ամյա Լենա տատիկը դժգոհեց, որ գյուղն անտեր է մնացել, ապրում են, բայց նորմալ չէ այն, ինչ կատարվում է իրենց շուրջը։
Մեկ այլ գյուղացի էլ հայտնեց, որ Մհեր Սիմոնյան անունով բնակչի տունն են քանդել, այժմ էլ նրան ուզում են տեղափոխել Կիրանց գյուղի մյուս ծայրը. տեխնիկան արդեն կանգնած է։
Նշենք, որ ավելի վաղ հայտարարվում էր, որ Ադրբեջանի հսկողության տակ անցնող տներից մարդկանց դուրս չգալու դեպքում հատուկ տեխնիկայով կամ ուժով կհանեն։ Խոսքը, մասնավորապես, Խանում Թամրազյանի և նրա ընտանիքի մասին էր, որը հստակ նշում էր` դուրս չի գալու իր տնից ինչ էլ որ լինի։
«Ոչ մի ուժ էլ չեն կիրառել, բռնություն չի եղել։ Փոխհատուցում են առաջարկել, իրենք էլ թողել, դուրս են եկել։ Չգիտեմ` որքան գումար են առաջարկել»,– ասաց կիրանցեցին։
Սրբազանն այս հարցի վերաբերյալ նշեց` մի կողմից մարդկանց սպառնացել են, որ այսինչ բանը չանելու դեպքում վռնդելու են, մյուս կողմից էլ՝ մարդկանց անորոշության են մատնել. գյուղը 2 մասի են բաժանել` մի հատվածին դարձնելով «ոչ հայրենասեր», մյուսին` «հայրենասեր»։ Նա այս իրավիճակն անվանեց աղետ։
Շարժման առաջնորդը շեշտեց` Կիրանցում տնավեր են արել ժողովրդին, նույնն էլ լինելու է ամբողջ Հայաստանում, եթե չկանգնեցնեն ՀՀ իշխանություններին։
