Երեկ «Հայաստան» խմբակցությունը հանդես էր գալիս «տրոյական ձիու» կարգավիճակով։ Այս մասին ԱԺ ամբիոնից ասաց «Քաղաքացիական պայմանագիր» խմբակցության ղեկավար Հայկ Կոնջորյանը:
«Իրենց կողմից շարժման առաջնորդ հռչակված վեղարով նեռի ներկայացուցիչը երեկ այդ դեպքերից մի քանի ժամ առաջ Բաղրամյան փողոցում խոսում էր ներքին թշնամիների մասին՝ նկատի ունենալով մեզ, ապա հայտարարում էր, որ պիտի մտնեն ԱԺ։
Այդ ընթացում «Հայաստան» ու «Պատիվ ունեմ» խմբակցությունների պատգամավորները միտումնավոր սադրում էին իրավիճակը, հրմշտում էին ոստիկաններին, բռնություն էին գործադրում ոստիկանների նկատմամբ ու փորձում էին ժողովրդի հետ մտնել ԱԺ։ Ոչ ոքի համար անակնալ չէ, թե ինչ էին նրանք փորձում անել։ Իրենց վեղարով առաջնորդի կողմից հայտարարվեց, որ փնտրում են նաև վարչապետին հաշվեհարդար տեսնելու համար»,- ասաց նա։
Պատգամավորը տեղի ունեցածը համեմատեց ահաբեկչության փորձի հետ և հավելեց, որ երեկ փորձ էր արվում կրկնել Հոկտեմբերի 27-ը:
«Հայաստանում երեկ փորձ էր կատարվում անել երկրորդ «Նոյեմբերի 9-ը», իսկ հաջողության պարագայում երկրորդ «Հոկտեմբերի 27»-ը։ «Հայաստան» դաշինքը նոր Նաիրի Հունանյանի «տրոյական ձին» էր այստեղ նստած։ Այս ամենում իր ուղիղ պատասխանատվությունը ունի Գարեգին Բ կաթողիկոսը, որովհետև վեղարով տերտերը, ով ինքնահռչակվել է որպես վարչապետի ապօրինի թեկնածու, հայտարարել է, որ իր գործողությունները օրհնել է Գարեգին Բ կաթողիկոսը ու նրա կողմից ոչ մի հերքում չի եղել։
Հայաստանում երկրորդ «Հոկտեմբերի 27»-ի կազմակերպման պատասխանատվությունը հավասարապես կրում է Գարեգին Բ կաթողիկոսը, որը ճակատագրի բերումով ընտրվել է հենց 1999 թվականի հոկտեմբերի 27-ին»,- ասաց նա:
