«Ժողովուրդ» թերթը գրում է. «Երևանի քաղաքապետարանը 13 մլն 740 հազար դրամ է նախատեսել ուսուցչի տոնին մանկավարժներին պարգևատրելու համար։ «Ժողովուրդ» օրաթերթը այս մասին տեղեկացավ պաշտոնական աղբյուրներից: Հայաստանում ուսուցչի տոնը նշվում է հոկտեմբերի 5-ին՝ ՅՈՒՆԵՍԿՕ-ի սահմանած ուսուցիչների համաշխարհային օրվա հետ։
«Պրոմո Պիար» ՍՊԸ-ն, որը ստանձնել է միջոցառման մատակարարի դերը, համաձայն գնման պայմանագրի՝ «մանկավարժներին արժևորելու նպատակով նախատեսված հանդիսավոր միջոցառման շրջանակում ապահովելու է հանրակրթության պետական չափորոշչի ներդրման լավագույն փորձի խրախուսմանն ուղղված նախաձեռնության շրջանակում մասնակցած և Երևանի քաղաքապետարանի կողմից ընտրված մանկավարժների (ուսուցիչներ, տնօրեններ, տնօրենների տեղակալներ, խմբակավարներ) պարգևատրում»-ը:
Ըստ պայմանագրի՝ նախատեսված է. «Միջոցառման ընթացքում Երևանի քաղաքապետարանի ճեմասրահում ընդհանուր առմամբ 80 անձի համար ապահովել՝ աթոռներ, ֆուրշետ ծառայություն, կանապեներ՝ մսային, աղցանային, բեկոնով, պանրով, հավով և բանջարեղենով, թխվածքի տեսականի՝ կրեմային և ոչ կրեմային, բնական հյութեր, հանքային ջուր, աղբյուրի ջուր, լայմով և անանուխով զովացուցիչ ըմպելիք, գինի, միրգ, սուրճ, կոկտեյլի 6 սեղաններ՝ ձգվող սփռոցով, սառույցի ամաններ, աղբի համար նախատեսված տարաներ, 4 մատուցող, երկու հավաքարար»։
Միջոցառումն ուղեկցվելու է դասական երաժշտության ստեղծագործությունների կատարմամբ և տևելու է առնվազն 2 ժամ։
Մատակարարը պետք է ապահովի. «70 փունջ ծաղիկ, յուրաքանչյուր փնջում՝ 11 վարդ ծաղիկներ. բացառապես թարմ, բնական վարդեր, տեսակը՝ հոլանդական կամ համարժեք, ծաղկի գլուխը (կոկոնը)՝ առնվազն 7 սմ տրամագծով, բարձրությունը՝ առնվազն 7 սմ, ցողունի երկարությունը՝ առնվազն 70 սմ, դեկորացիայի համար նախատեսված ժապավենով փնջավորված: Փնջերում ծաղիկների գույնը և փաթեթավորման ձևը նախապես համաձայնեցնել հանրակրթության վարչության հետ»:
Երևանի քաղաքապետարանը շռայլ է գտնվել և բոլոր մանկավարժների համար խրախուսական նվեր է պատրաստել։ Այսպիսով՝ «թվով 70 մանկավարժներին տրամադրել դրամական պարգևատրում. բանկային նվեր քարտ 100.000-ական դրամով՝ թվով 26 մանկավարժներին, թվով 27 մանկավարժներին բանկային նվեր քարտ՝ 150.000-ական դրամով, և 17 մանկավարժներին՝ 200.000-ական դրամով»:
«Պրոմո Պիար» ՍՊԸ-ի դեմ, որը հանդիսանում է միջոցառման կազմակերպիչը և անհրաժեշտ ծառայությունների մատակարարը, կիրառվել են սահմանափակումներ՝ համաձայն ՀՀ իրավաբանական անձանց պետական ռեգիստրի։
Տեղեկացնենք, որ ընկերության 100% բաժնետերը Արա Սիմոնյանն է, որի նկատմամբ ՀՀ ՊԵԿ-ը կիրառել է վարչական տույժ, քանի որ «ՀՀ և եվրասիական տնտեսական միության անդամ պետությունների միջև անուղղակի հարկերի հաշվարկման և վճարման առանձնահատկությունների մասին» ՀՀ օրենքի 8-րդ հոդվածով՝ սահմանված ժամկետում չի ներկայացրել 02.09.2019-ին և 08.09.2019-ին կատարած ներմուծումների վերաբերյալ ներմուծման հարկային հայտարարագրերը և հայտարարությունները, ինչի հիման վրա վարչական պատասխանատվության է ենթարկվել։
Համաձայն վարչական իրավախախտման վերաբերյալ ՀՀ օրենսգրքի 169-րդ հոդվածի 2-րդ մասի՝ Արա Սիմոնյանի նկատմամբ կիրառվել է վարչական տույժ՝ նշանակել տուգանք 10 հազար դրամի չափով»։
