Արդեն տխուր ավանդույթ է դարձել տարին կորուստներով եզրափակելը. չորս Սրբազան հայրեր կալանավորված են, Եկեղեցու վրա հարձակումները շարունակվում են պետական բարձր մակարդակով, քաղաքական բանտարկյալների թիվը ռեկորդային է: 24News-ի հետ զրույցում, խոսելով 2025-ին կատարված իրադարձությունների մասին, ասաց ՀՀԿ ԳՄ անդամ, ԱԺ նախկին փոխնախագահ Էդուարդ Շարմազանովը:
«Իրականում հակառեկորդների տարի էր, Նիկոլը երեկ խոսում էր, թե ռեկորդային թվով աշխատատեղեր են բացվել, քո օրոք ռեկորդային թվով մարդ է անտուն մնացել, ռեկորդային թվով դպրոց է թողնվել թուրքին: Ասում է՝ դպրոց ենք կառուցում, բայց դասագրքերի «մայրիկը լացացրիր», եվրոպատե՞րն են կարևո՞ր, թե՞ որ Մաշտոցը լինի էդ գրքում»:
Էդուարդ Շարմազանովը նաև ընդգծեց, որ 2025թ-ը պետության ազգային ողնաշարի քայքայման ու թուլացման տարի էր: Ըստ նրա՝ Փաշինյանը ՀՀ-ն դրել է շատ բարդ վիճակի մեջ, իսկ այլընտրանքը հեղափոխությանը չմասնակցած ուժերն են:
«Նախկին ու ներկան Նիկոլի թեզն ա, բաժանումը լինում ա՝ ազգային-ապազգային, պետականամետ-ոչ պետականամետ, նախկին երեք համակարգերն իրար հետ խորքային խնդիրներ են ունեցել, բայց կարմիր գծերը հստակ են եղել»:
Էդուարդ Շարմազանովն ընդգծեց, որ բոլոր երեք նախագահները հաղթանակն են մարմնավորում, ներկան՝ պարտությունը, և եթե այս երկուսի մեջ հասարակությունը ընտրում է Նիկոլ Փաշինյանին, ուրեմն արժանի չէ ունենալ անկախ պետություն:
Մեր դիտարկմանը, թե Նիկոլ Փաշինյանը ամեն օր հիշեցնում է, որ խաղաղություն է բերել, ինչի ապացույցն է Ադրբեջանից Հայաստան ներկրված ցորենը և նավթամթերքը, Էդուարդ Շարմազանովը պատասխանեց.
«Թուրքիայի հայկական համայնքում բենզին էլ կա, ցորեն էլ կա, թող գնան էնտեղ, ուտեն թուրքական շաուրմա ու քյաբաբ, ի՞նչ կապ ունի դա խաղաղության հետ, երևի ստրկացում նկատի ունի ինքը: Ստրուկները, երբ ստրկատերերի մոտ չեն ապստամբում, խաղաղ է լինում, էդ պրոցեսն է»:
ՀՀԿ ԳՄ անդամն ընդգծեց, որ եթե իսկապես խաղաղություն է հաստատվել, ապա օգոստոսի 8-ին Վաշինգտոնում նախաստորագրված խաղաղության համաձայանագրի մեջ պիտի տեղ գտնեին գերիների ազատ արձակման ու արցախցիների վերադարձի մասին դրույթներ:
«Խաղաղություն չկա, այն ստրկացված է, Ղարաբաղում էլ է խաղաղ, բայց հայ չկա, դրոշ չկա, մեր եղբայրներն էլ Բաքվի բանտում են»: