Եգիպտոսը, Սաուդյան Արաբիայի, Կատարի և Օմանի հետ միասին, երկու օր ակտիվ դիվանագիտական ջանքեր էր գործադրում Վաշինգտոնի հետ, մինչև ԱՄՆ նախագահ Դոնալդ Թրամփը փոխեց իր որոշումը Իրանին հարվածելու վերաբերյալ, հաղորդում է Reuters-ը՝ հղում անելով Պարսից ծոցի աղբյուրներին։
Արևմտյան լրատվամիջոցները նախկինում հաղորդել էին, որ Սաուդյան Արաբիան, Կատարը և Օմանը փորձում էին համոզել Թրամփին չհարվածել Իրանին։ Հինգշաբթի օրը Financial Times-ը՝ հղում անելով աղբյուրներին, հաղորդել էր, որ արաբական երկրների պաշտոնյաները կարծում են, որ Պարսից ծոցում լարվածությունը նվազել է, քանի որ ակտիվ դիվանագիտական ջանքերը օգնել են Թրամփին հետ պահել Իրանին հարվածելուց և ժամանակ ստեղծել բանակցությունների համար։
«Սաուդյան Արաբիան, Կատարը, Օմանը և Եգիպտոսը 48 ժամ դիվանագիտական բանակցություններ են վարել, նախքան ԱՄՆ նախագահ Դոնալդ Թրամփը հինգշաբթի օրը ազդարարեց, որ վերջապես որոշել է առայժմ չհարձակվել», — գրում է գործակալությունը։
Հաղորդվում է, որ չորս երկրները Վաշինգտոնին հստակորեն հասկացրել են, որ ցանկացած հարձակում կունենա անվտանգության և տնտեսական հետևանքներ ամբողջ տարածաշրջանի համար, որը, ի վերջո, կազդի նաև Միացյալ Նահանգների վրա։
Գործակալության տվյալներով՝ Պարսից ծոցի երկրները վախենում են, որ իրենց տարածքում գտնվող ամերիկյան ռազմական և էներգետիկ օբյեկտները կարող են դառնալ Իրանի կողմից ձեռնարկվող հակահարվածների թիրախ։ Աղբյուրները նշում են, որ Իրանը ստացել է այն ուղերձը, որ Պարսից ծոցում գտնվող ամերիկյան օբյեկտների վրա ցանկացած պատասխան հարձակում հետևանքներ կունենա Թեհրանի՝ տարածաշրջանի մյուս երկրների հետ հարաբերությունների համար։
