Պետդեպը դատապարտում է միջազգային իրավունքի նորմերի բոլոր խախատումները և միանում միջազգային և տեղական դիտորդների կոչերին՝ ընտրությունների հետ կապված խախտումների վերաբերյալ բոլոր հաղորդումների ամբողջական հետաքննության վերաբերյալ: Այս մասին ասված է ԱՄՆ պետքարտուղար Էնթոնի Բլինկենի՝ Վրաստանում կայացած խորհրդարանական ընտրությունների վերաբերյալ ուղերձում:
Նա ընդգծել է, որ 2024 թվականին միջազգային և տեղական դիտորդները նշել են, որ նախընտրական միջավայրում առկա է իշխող կուսակցության կողմից հանրային ռեսուրսների չարաշահում, ձայների գնում և ընտրողների ահաբեկում, ինչը նպաստել է անհավասար միջավայրի ստեղծմանը և խաթարել հասարակության և միջազգային վստահությունն արդար արդյունքի հնարավորության նկատմամբ։
«Թեև միջազգային և տեղական դիտորդները համաձայնել են, որ ընտրությունների օրը, ընդհանուր առմամբ, լավ է կազմակերպվել, սակայն կան խախտումների և բռնությունների մասին հաղորդումներ: Միջազգային դիտորդները արդյունքները չեն ճանաչել ազատ և արդար։ Մենք դատապարտում ենք միջազգային նորմերի բոլոր խախտումները և միանում ենք միջազգային և տեղական դիտորդների կոչերին՝ ընտրությունների հետ կապված խախտումների վերաբերյալ բոլոր հաղորդումների ամբողջական հետաքննության վերաբերյալ:
Մենք կոչ ենք անում Վրաստանի քաղաքական առաջնորդներին հարգել օրենքի գերակայությունը, չեղյալ համարել հիմնարար ազատությունները խաթարող օրենսդրությունը և միասին վերացնել ընտրական գործընթացի թերությունները։ Վրաստանի եվրոպական և եվրաատլանտյան ինտեգրման նպատակները, որոնք ամրագրված են երկրի սահմանադրությամբ, պահանջում են, որ կառավարությունը հարգի քաղաքացիական հասարակության անդամների իրավունքները և Վրաստանի բոլոր քաղաքացիների հիմնարար ազատությունները», — ասվում է ուղերձում:
