Փաստաբան Հովհաննես Խուդոյանը կարծում է, որ ՔՊ-ից հեռացված պատգամավոր Հովիկ Աղազարյանի նկատմամբ հետապնդումն իրականացվում է քաղաքական շարժառիթներով։
«Չի բացառվում, որ արժանահավատ ապացույցներով կարող է վաղը կամ մյուս օրն ապացուցվի, որ Հովիկ Աղազարյանը կատարել է ինչ-որ հանցագործություն, բայց քաղաքական հետապնդումների չափանիշների տիրությում առաջնային հարցը սա է՝ արդյո՞ք ինքը հետապնդման կենթարկվեր, եթե, օրինակ, ընդուներ առաջարկն ու հրաժարվեր մանդատից»,- «Քաղաքական իրավունքները և հետապնդումները Հայաստանում» թեմայով քննարկման ժամանակ ասաց Խուդոյանը։
Փաստաբանի խոսքով՝ այսօր առկա տեղեկատվությունը հուշում է, որ եթե ինքն այդ քայլին գնար, ամենայն հավանականությամբ, այս գործընթացները չէին լինելու։
«Այսինքն՝ մենք էլի գալիս ենք այն հարցին, որ, այո՛, հնարավոր է՝ անձը կատարած լինի հանցագործություն, ընդ որում, շատ վատ հանցագործություն, բայց ինքը, միևնույն է, քաղաքական հետապնդման զոհ է, որովհետև իր նկատմամբ հետապնդում իրականացվում է ոչ թե քրեական օրենքի նպատակներով, այլ՝ շատ հստակ ուրվագծվող քաղաքական շարժառիթներով»,- հավելեց Խուդոյանը։
