Զինված ուժերի գլխավոր շտաբի պետի նախկին տեղակալ, գեներալ-լեյտենանտ Տիրան Խաչատրյանին 2 ամսով կալանավորելու դատարանի որոշման դեմ պաշտպանական թիմը պատրաստվում է այսօր կամ վաղը Վերաքննիչ բողոք ներկայացնել։ Այդ մասին «Հրապարակ»-ի հետ զրույցում ասել է Տիրան Խաչատրյանի պաշտպաններից Վարազդատ Հարությունյանը։
Անդրադառնալով մեղադրանքին պաշտպանն ասել է․ «Հաշվի առնելով, որ գործն ինքնին աբսուրդ է, իսկ կալանքը էլ ավելի աբսուրդ է, որովհետև միջին ծանրության հանցագործության համար 4 տարի քննությունից հետո, երբ Տիրան Խաչատրյանը որևէ կերպ չի խոչընդոտել քննությանն, այլ հակառակը՝ բացառիկ համագործակցային վարք է դրսևորել, հարցաքննվել է, երբ պետք է եղել, մասնակցել է տարբեր վարույթների գործողությունների, փորձաքննությանը լրացուցիչ իր կողմից հարցեր է առաջադրել, որպեսզի գործի օբյեկտիվ հանգամանքները պարզվի, էդքանից հետո, հոկտեմբերին էլ, վաղեմության ժամկետներն են լրանում, ինչը Վճռաբեկ դատարանի նախադեպային դիրքորոշման համաձայն՝ բացառում է կալանքը որպես խափանման միջոց ընտրել, եթե անձը չի խախտել արդեն եղած խափանման միջոցի պայմանը, նշանակում է, որ այս ամենի հաշվարկմամբ, բոլոր տեսակի ենթադրությունները՝ քաղաքական, արտաքին և այլն, կենսունակ են։ Օրենքից չբխող իրավիճակի մեջ ենք գտնվում, ուրեմն ցանկացած այլ ենթադրություն, թե ինչ իրավիճակով է պայմանավորված այս ամեն ինչը, կենսունակ է»։
Հարցին, թե Տիրան Խաչատրյանը առողջական խնդիրներ ունի՞, «Վարդաշեն» ՔԿՀ-ում գտնվող զինվորականն ինչպե՞ս է իրեն զգում, Վարազդատ Հարությունյանն ասել է, որ առողջականի մասով իրավասու չէ հրապարակային որեւէ բան հայտարարել, բայց որոշակի խնդիրներ կան․ «Տիրան Խաչատրյանը հաշմանդամության կարգ ունի․ պատերազմի ժամանակ է վիրավորվել երկու ոտքից, այս ամենի հետևանքով որոշ խնդիրներ կան, որոնց հետ կապված՝ չունեմ համաձայնություն հրապարակային ներկայացնելու»։
Մեկ այլ հարցի՝ հաշմանդամության կարգ ունենալը դատարանը հաշվի չառա՞վ, փաստաբանը պատասխանել է՝ ոչինչ էլ հաշվի չեն առել։
Տարեսկզբին Տիրան Խաչատրյանը երկու ամսով կալանավորվել էր։
Ավելի վաղ նա ձերբակալվել էր 44-օրյա պատերազմին առնչվող գործով: Տիրան Խաչատրյանին մեղադրանք են առաջադրել ռազմական դրության ընթացքում իր ծառայողական պարտականությունների կատարման նկատմամբ անփույթ վերաբերմունքի համար, որն առաջացրել է ծանր հետևանքներ։ Նա մեղադրանքը չի ընդունում։
