Հանրապետության նախագահ Վահագն Խաչատուրյանը պատրաստակամություն է հայտնել նախագահական ինստիտուտը ծառայեցնել կրթության և գիտության զարգացմանը: Այս մասին ասաց ՀՀ նախագահն Վահագն Խաչատուրյանը ԵՊՀ-ում Գիտխորհրդի անդամների հետ հանդիպման ժամանակ:
«Սպասելիքները ԵՊՀ-ից շատ մեծ են հասարակության, քաղաքացիների, պետության և իշխանության մոտ, որովհետև, ի վերջո Հայաստանի Հանրապետության զարգացման ներուժը գիտությունը, կրթությունն ու մարդն են. մենք այլ հնարավորություն չունենք: Ես էլ ձեզանից մեկն եմ և պատրաստ եմ նախագահական ինստիտուտը ցանկացած հարցում ծառայեցնել կրթության, առավելևս գիտության զարգացմանը»,-ասաց նախագահը:
Նախագահը անդրադարձավ բարձրագույն կրթության կարևորությանը, ապա խոսեց խնդիրների ու մարտահրավերների մասին. «Հայաստանի Հանրապետությանը հարկավոր են կրթված մարդիկ: Եվ նախագահականում, և հատկապես նախարարությունում ես զգացի, որ մենք լուրջ մասնագետների պակաս ունենք: Շատերը քննադատում էին Բարձր տեխնոլոգիաների և արդյունաբերության նախարարությանը կադրերի պակաս ունենալու հարցում, բայց դրա պատճառը այն չէր, որ դա որևէ մեկի կամակորությունն էր, այլ ուղղակի հասկացանք՝ այն չափանիշները, որ դրել էինք ընտրություն կատարելու համար, դրանց համապատասխանող մասնագետները շատ քիչ էին»,- եզրափակեց նախագահը:
