Հայաստանի առևտրաշրջանառությունը ԵԱՏՄ անդամ երկրների հետ աճում է, լրագրողների հետ զրույցում ասաց ԱԺ Տարածաշրջանային և եվրասիական ինտեգրման հարցերի մշտական հանձնաժողովի նախագահ Վաղարշակ Հակոբյանը։
Ըստ նրա՝ Հայաստանը շատ ներդաշնակ քայլերով աշխատում է գործընկերների հետ բոլոր ոլորտներում։
«Ես շատ բարձր եմ գնահատում այդ համագործակցությունն ու կարծում եմ, որ Հայաստանը 5-6 տարվա ընթացքում շատ մեծ թափով կարողացել է օգտագործել ԵԱՏՄ ընձեռած հնարավորությունները»,- նշեց նա։
ՔՊ-ականի խոսքով՝ ԵՄ-ի հետ հարաբերությունները պետք չէ դիտարկել հակադրությունների մեջ։
«ՀԱՊԿ-ն ու ԵԱՏՄ-ն լրիվ տարբեր բաներ են, ես հստակ կարող եմ արձանագրել, որ ՀԱՊԿ-ում մեր անդամակցությունը սառեցնելը հստակ հիմքեր ունի ու այդ հիմքերի մասին բազմաթիվ անգամ նշել ենք, իսկ ԵԱՏՄ-ի հետ կապված՝ մենք շատ լավ համագործակցություն ունենք, ինչը շատ լավ ձևով երևում է մեր տնտեսության զարգացման վրա»,- ասաց նա։
