Yerkir.am-ը գրել է.
«Նիկոլ Փաշինյանն ու Աննա Հակոբյանը 2024 թ. դեկտեմբերի 16-ին ֆեյսբուքյան էջում հերթական փոդքասթի ժամանակ անդրադարձել են այն հարցին, թե ամուսնացա՞ծ են, թե՞ ամուսնացած չեն։
«Դեկտեմբերին կլրանա մեր ամուսնության 27-րդ տարին։ Որևէ դե յուրե կարգավիճակով ամուսնացած չենք, բայց, իհարկե, մեր կյանքում էդ ամուսնական էտապներն եղել են՝ նշանդրեք, սինի, նվերներ և այլն։ Հարսանիք չենք ունեցել, փոխարինող խնջույք ենք ունեցել։ Դե յուրե ո՛չ զագսով, ո՛չ եկեղեցով ամուսնացած չենք։
Մյուս կողմից էլ մտածեցի՝ արդեն որերորդ տարին հայտարարագիր ես լրացնում որպես վարչապետի կին, եթե այդ հայտարարագիրը հանենք, ուրիշ պաշտոնական թուղթ չկա»,- ասել է Փաշինյանը։
Yerkir.am-ը գրավոր հարցում էր ուղարկել ՀՀ աշխատանքի և սոցիալական հարցերի նախարարություն՝ պարզելու՝ արդյոք ՀՀ վարչապետի արդեն «ոչ իրավաբանական տիկին» Աննա Հակոբյանը, իբրև միայնակ կին և 3 անչափահասների մայր, նախկինում երբևիցե ստացե՞լ է նպաստ, պետական այլ օժանդակություն և այլն: «Խնդրել էինք նշել ստացված պետական օժանդակության, իսկ եթե դրանք մեկից ավելին են՝ օժանդակությունների տեսակը, ինչպես նաև այն ժամանակահատվածը / ժամանակահատվածները, երբ Աննա Հակոբյանը ստացել է դրանք: Խնդրում եմ նույն հարցերին պատասխանել նաև Աննա Հակոբյանի երեք երեխաների մասով:
Պատասխան գրությամբ՝ նախարարությունը տեղեկացրել է, որ ներկայացված հարցերը պարունակում են երրորդ անձի անձնական տվյալների վերաբերյալ տեղեկություններ, և հայցվող տեղեկատվությունը տրամադրման ենթակա չեն»։
