Սիրիայի նախկին նախագահ Բաշար ալ Ասադի կինը՝ Ասմա ալ Ասադը, Սիրիայից հեռանալուց հետո առաջին անգամ խախտել է լռությունը՝ հույս հայտնելով, որ լավ օրերը դեռ կվերադառնան Սիրիա: Այս մասին գրում է Mehr գործակալությունը:
«Սիրիայի ժողովրդին մաղթում եմ անվտանգություն և բարգավաճում, հուսով եմ, որ լավ օրերը կվերադառնան Սիրիա: Հայրենիքն ուժ է, որն ահնար է կործանել: Ինչպիսի մարտահրավերների էլ հանդիպենք, դրանք չեն կարողանա կոտրել այս երկրի ժողովրդին: Մենք միասին շարժվում ենք դեպի ապագա», — նշել է նախկին առաջին տիկինը:
Նա ընդգծել է, որ վերջին տարիներին քաղաքական հարցերի առնչությամբ լռություն է պահպանել և պատրաստվում է նույն կերպ շարունակել:
«Հայրենիքը սոսկ աշխարհագրական կետ չէ, այլ զգացում, որը մնում է մեր սրտերում՝ չնայած հեռավորությանը։ Կյանքի յուրաքանչյուր փուլ ունի իր դասը, և յուրաքանչյուր փոփոխություն ունի իր իմաստը: Ամեն մարդ ունի իր ուղին, և այդ ուղիներից որոշները կամավոր ընտրություն չեն», — ասել է Ասմա ալ Ասադը:
Հիշեցնենք, որ դեկտեմբերի 8-ի առավոտյան ահաբեկչական խմբավորումների զինյալները մտել են Դամասկոս, Սիրիան անցել է նրանց վերահսկողության ներքո։ Նախագահ Բաշար Ասադը հակամարտության մի շարք մասնակիցների հետ բանակցելուց հետո որոշել է հրաժարվել պաշտոնից և լքել երկիրը: Ասադն ընտանիքի հետ մեկնել է Մոսկվա. ՌԴ-ն ապաստան է տրամադրել նրանց:
