Հունգարիայի վարչապետ Վիկտոր Օրբանը հայտարարել է, որ խնդրել է Ուկրաինայի նախագահ Վլադիմիր Զելենսկիին ուսումնասիրել հրադադարի հնարավորությունը, հետո անցնել խաղաղության բանակցություններին։ Օրբանի կարծիքով՝ հրադադարի հաստատումը կարող է արագացնել բանակցությունները։
«Մենք բարձր ենք գնահատում նախագահ Զելենսկու՝ խաղաղության վերաբերյալ նախաձեռնությունները և խնդրել ենք նրան քննարկել հրադադարի հաստատումը նախքան խաղաղության բանակցությունները սկսելը», — ասել է Հունգարիայի վարչապետը մամուլի ասուլիսում:
Վիկտոր Օրբանն ընդգծել է, որ Հունգարիան կցանկանար բարելավել հարաբերությունները Ուկրաինայի հետ՝ չնայած տարաձայնություններին, և կնքել երկկողմ համագործակցության համաձայնագիր։ Բուդապեշտը պատրաստ է օգնել արդիականացնել Ուկրաինայի տնտեսությունը, նշել է վարչապետը։
Զելենսկին նշել է, որ Ուկրաինան բարձր է գնահատում Վիկտոր Օրբանի այցը ԵՄ-ում Հունգարիայի նախագահության ժամանակ։
