Վեհափառը հոգևորականների ուղեկցությամբ այցելել է Ծիծեռնակաբերդի հուշահամալիր՝ հարգանքի տուրք մատուցել անմեղ զոհերի հիշատակին, ապա լրագրողների հետ զրույցում կարճ ուղերձ փոխանցել:
«Այսօր, սիրելինե՛ր, ոգեկոչում ենք Հայոց ցեղասպանության 110-րդ տարելիցը, ոգեկոչում ենք Արցախում մեր ժողովրդի զավակաց հանդեպ իրագործված ցեղասպանական գործողությունների, արցախյան կորուստների ցավը մեր սրտում: Ծիծեռնակաբերդի նվիրական այս բարձրունքին մեր հոգևորականաց և մեր ազգի զավակաց հետ միասին աղոթքվեր առաքեցինք առ Աստված՝ հայցելով, որ Տերը զորացնի մեր ժողովրդին՝ իր հոգու ցավն ու տրտմությունը և տառապանքն ուժի վերածելու, հաղթահարելու մեր կյանքում առկա դժվարությունները և նորանոր իրագործումներով շենացնելու հայրենական մեր երկիրը և կերտելու մեր ժողովրդի պայծառ ու լուսավոր կյանքը: Թող Աստված օգնական ու պահապան լինի ազգիս, հայրենաշինության իր առաքելության նվիրական իր ճանապարհին: Տիրոջ սերն ու ողորմությունն այսօր և միշտ թող ուղեկից լինի ազգիս հայոց»,- մասնավորապես ասաց Վեհափառը:
Վեհափառը լրագրողների հարցերին չպատասխանեց. միայն նշեց. «Մեր ուղերձը քիչ հետո հընթացս սուրբ պատարագի ուղղելու ենք մեր ժողովրդին Մայր տաճարից»:
