Yandex-ի հիմնադիր Արկադի Վոլոժը հրաժարվել է Ռուսաստանի քաղաքացիությունից գրեթե երկու տարի անց՝ ընկերությունում իր բաժնեմասը վաճառելուց հետո և կենտրոնացել է հոլանդական Nebius Group NV ընկերության զարգացման վրա, հաղորդում է Bloomberg-ը։
Գործակալությանը աղբյուրը հայտնել է, որ 62-ամյա միլիարդատերը այս շաբաթ հաստատում է ստացել, որ այլևս Ռուսաստանի քաղաքացի չէ։
Վոլոժը, ով իսրայելական անձնագիր ունի և ավելի քան 10 տարի ապրել է Իսրայելում, Yandex-ը վերածել է տեխնոլոգիական հսկայի, որը գերիշխում է որոնողական համակարգերի, տաքսիների և էլեկտրոնային առևտրի ռուսական շուկայում, հիշեցնում Է Bloomberg-ը:
Ուկրաինայում պատերազմի սկսվելուց հետո Yandex-ը հայտնվեց ուժեղ ճնշման տակ ինչպես Ռուսաստանում, այնպես էլ արտերկրում։ Nasdaq-ում նրա բաժնետոմսերի առևտուրը կասեցվեց ներխուժումից անմիջապես հետո։ Այդ տարվա հունիսին Վոլոժը հրաժարական տվեց Yandex-ի գործադիր տնօրենի պաշտոնից, այն բանից հետո, երբ նրա նկատմամբ ԵՄ պատժամիջոցներ կիրառվեցին՝ ընկերության կողմից ռուսական քարոզչության և ապատեղեկատվության տարածման գործում ունեցած դերի համար։
2023 թվականին Վոլոժը հրապարակավ դատապարտեց Ուկրաինա ներխուժումը՝ պնդելով, որ լռել է, մինչ Yandex-ի ռուս ինժեներներին օգնում էր լքել երկիրը։ Ավելի ուշ ԵՄ-ն վերացրեց պատժամիջոցները։ 2024 թվականին Yandex-ի ռուսական բիզնեսը վաճառվեց ռուս ներդրողների խմբի 5.2 միլիարդ դոլարով: Վաճառքից հետո Yandex-ի հոլանդական հոլդինգային ընկերությունը վերանվանվեց Nebius:
