Կիրակի Միացյալ Նահանգները հայտարարել է, որ զորք և ամերիկյան առաջադեմ հակահրթիռային համակարգ կուղարկի Իսրայել՝ ուժեղացնելու Իսրայելի հակաօդային պաշտպանությունը, հաղորդում է Reuters-ը:
Ըստ պաշտոնյաների՝ Միացյալ Նահանգները մասնավոր կերպով կոչ է արել Իսրայելին ճշգրտել իր պատասխան միջոցները՝ Մերձավոր Արևելքում ավելի մեծ պատերազմ սանձազերծելուց խուսափելու համար: Բայդենը հրապարակավ իր անհամաձայնությունն ու մտահոգությունն է հայտնել Իսրայելի հարձակմանը Իրանի միջուկային օբյեկտների և էներգետիկ ենթակառուցվածքների վրա:
Լրատվական գործակալությունը նշում է, որ Իսրայելում ամերիկյան զորքերի տեղակայումը հազվադեպ է, բացառությամբ զորավարժությունների` հաշվի առնելով Իսրայելի սեփական ռազմական ներուժը: Ամերիկյան զորքերը վերջին ամիսներին օգնում էին Իսրայելին Մերձավոր Արևելքում պաշտպանվել Իրանի հարձակումներից: Բայց նրանք տեղակայված էին Իսրայելի սահմաններից դուրս:
Իրանի արտաքին գործերի նախարար Աբբաս Արաղչին կիրակի ավելի վաղ նախազգուշացրել էր, որ Միացյալ Նահանգները «վտանգում է իր զինվորականների կյանքը՝ նրանց տեղակայելով Իսրայելում ամերիկյան հրթիռային համակարգերը կառավարելու համար»:
«Թեև մենք վերջին օրերին հսկայական ջանքեր ենք գործադրել մեր տարածաշրջանում համապարփակ պատերազմը զսպելու համար, ես հստակ ասում եմ, որ մենք կարմիր գծեր չունենք մեր ժողովրդին և շահերը պաշտպանելու հարցում»,- գրել է Արաղչին X-ում:
